Ўзбекистон Монополияга қарши кураш қўмитаси Қашқадарё вилояти Муборак туманида «Буюк келажак сари» МЧЖ раҳбари Элнура Мирзаеванинг бино қуриш бўйича юзага келган муаммосини ечишда ёрдам кўрсатди. Бу ҳақда қўмита томонидан хабар берилди.
Маълум қилинишича, тадбиркор 2018—2019 йилларда «Ҳар бир оила — тадбиркор» дастури доирасида ўзининг бизнес лойиҳаси асосида имтиёзли кредит олган. Олинган кредит маблағига қурилиш материаллари, ускуна, жиҳозлар харид қилган ва ҳар ойда олти миллион сўмдан кредит тўлаб келган.
Тадбиркор Муборак тумани «Кончилар» МФЙ саноат зонаси ҳудудидан танланган 600 квадрат метр ер майдонида қурилиши режалаштирилаётган автотранспорт воситаларига техник хизмат кўрсатиш биноси жойлашуви жойини Қашқадарё вилояти архитектура-шаҳарсозлик кенгашининг йиғилишида кўриб чиқилиши учун ҳужжатлар тақдим этган.
Бироқ ажратилган ер майдони бўйича тадбиркор барча рухсат олиш жараёнларидан ўтганлигига қарамасдан, Қашқадарё вилояти Қурилиш бош бошқармаси ҳеч қандай сабабларсиз тайёр ҳужжатни 2019 йилнинг август ойидан буён тасдиқлаб бермаган.
Тадбиркор кўтарган масала қўмита томонидан ўрганилди ва ер майдонида лойиҳалаш ва қурилиш ишларини амалга оширишда ҳеч қандай тўсиқлар мавжуд эмаслиги маълум бўлди. Шунга кўра, қўмитанинг аралашуви билан автотранспорт воситаларига техник хизмат кўрсатиш биноси жойлашуви ўрнини Қашқадарё вилояти Қурилиш бош бошқармаси ҳузуридаги Қашқадарё вилоят архитектура-шаҳарсозлик кенгаши бир кун ичида тасдиқлаб берди.
Шу тариқа, тадбиркорга Муборак туманида 5 та янги иш ўрин яратиладиган бизнес лойиҳасини амалга оширишга имконият яратилди, дейилади қўмита хабарида.
Изоҳ (0)