Тасдиқланмаган маълумотларга кўра, ер ўпирилиши оқибатида бир неча киши тупроқ остида қолиб кетган.
«Kun.uz» Ички ишлар вазири ўринбосари, ИИВ Тергов департаменти бошлиғи Дониёр Тошхўжаевдан ҳодиса юзасидан изоҳ олди.
«Дастлабки маълумотларга кўра, Юнусобод туманида, ‘Мегапланет’ олдида туннел қазилаётган бўлган. Сув туннелга тушмаслиги учун бетон лоток қилинган. Ана шу лотокнинг қайсидир қисмидан сув кетган ва сув тўпланган. Ёғингарчилик кучайган вақтда ер бўшаб туннелни босиб қолган.
Ҳозирча ҳодиса оқибатида ҳалок бўлганлар ёки жабрланганлар борлиги ҳақида аниқ маълумот йўқ. Бу ҳудудда олиб бориладиган ишлар натижасида аниқланади», дейди вазир ўринбосари.
Айни вақтда ҳудудда қидирув-қутқарув ишлари олиб борилмоқда.
Ҳозирча Фавқулодда вазиятлар вазирлиги бу борада расмий маълумот бермади.
«Дарё» манбасининг хабар беришича, Ўзбекистон Бош вазири Абдулла Арипов воқеа жойига бориши кутилмоқда.
«Ўзбекистон темир йўллари» АЖ матбуот хизмати Тошкент метрополитени Юнусобод линиясида қурилиш ишлари олиб борилаётган очиқ участкада авария ҳолати юз берганини тасдиқлади. Ҳозирда Бош вазир биринчи ўринбосари Очилбой Раматов шахсий назорати остида хизмат текшируви ўтказилмоқда.
Хизмат текшируви натижалари ҳақида жамоатчиликка ахборот берилади, дейилади хабарда.
«Potrebitel.uz»нинг ёзишича, ҳодиса гувоҳлари портлаш овози ва ишчиларнинг бақиргани эшитилганини айтган. Ҳозирда ҳудудда бир нечта тез ёрдам машинаси ишламоқда. Авария юз берган ҳудудда автомобиллар ҳаракати тўхтатилган.
Гувоҳлар жабрланганларнинг тез ёрдам машинаси олиб кетаётганини айтган, шунингдек тупроқ ўпирилган жойга автомобилларнинг тушиб кетган бўлиши мумкинлиги тахмин қилинмоқда.
Маълумот учун, «Юнусобод» йўналиши 2001 йил 24 октябрда дастлабки олти бекат — «Мингўрик», «Юнус Ражабий», «Абдулла Қодирий», «Минор», «Бодомзор», «Ҳабиб Абдуллаев» номлари билан фойдаланишга топширилган.
Изоҳ (0)