Ўзбекистон ва Тожикистонда хизмат кўрсатган артист Ҳожибой Тожибоевнинг Tashkent City мажмуасидаги истироҳат боғи таркибида ўрнатилган ҳайкалининг очилиш маросими бўлиб ўтди. Бу ҳақда «Дарё» мухбири Феруз Муҳаммад хабар бермоқда.
Маросимда журналист, бошловчи Муҳаббат Ҳамроева бошловчилик қилди. Ҳожибой Тожибоевнинг ҳайкали очилиш маросимида Ўзбекистонда хизмат кўрсатган журналист Ашурали Жўраев, Ўзбекистонда хизмат кўрсатган артист Мирзабек Холмедов, Мадина Муҳторова, Ҳожиакбар Комилов, кулгу устаси Валижон Шамсиев, Ҳожибой Тожибоевнинг рафиқаси Шаҳло Тожибоева, қизлари Интизор, Руҳангиз ва Мадинабону Тожибоевалар ҳамда Ҳожибой Тожибоевнинг яқинлари, шогирд ва мухлислари иштирок этди.
Маросимга йиғилган сўз ва кулгу усталари, Ҳожибой Тожибоевнинг шогирдлари Ҳожибой Тожибоевни хотирлади, унинг ўзбек қизиқчилик санъатида тутган ўрни, кундан кунга унинг санъати оммалашиб бораётгани ҳақида сўзлади.
Маълумот учун, Ўзбекистон ва Тожикистонда хизмат кўрсатган артист Ҳожибой Тожибоев 1955 йил 25 август куни туғилган. «Бухоро-о-о!», «Калла қўйган Зидан», «Борма, куясан! Ана куйдинг!», «Ҳозир бориб сев!», «Янги бойлар ва тракторчилар ҳақида» каби кўплаб иборалари ва ҳазиллари билан ўзбек томошабинларига яхши таниш. Ҳожибой Тожибоев 2008 йили 53 ёшда вафот этган.
Изоҳ (0)