Осиё тараққиёт банки Тошкентда мактаблар қурилишида маслаҳатчилик қилади

Ўзбекистон халқ таълими вазири Шерзод Шерматов ва Осиё тараққиёт банки (ОТБ)нинг Ўзбекистондаги доимий ваколатхонаси директори ўринбосари Энрико Пинали Тошкентнинг Сергели туманидаги умумий ўрта таълим мактаблари қурилиши ва реконструкциясига кўмак бериш учун давлат-хусусий шериклик масалалари бўйича маслаҳат хизматларини кўрсатишга оид шартномани имзолади. Бу ҳақда Халқ таълими вазирлиги матбуот хизмати хабар берди.

Маълум қилинишича, лойиҳанинг асосий мақсади Сергели туманида еттита янги умумий ўрта таълим мактабини қуриш, олтита мактабни таъмирлаш ва битта мактабни реконструкция қилишдан иборат.

Қайд этилишича, ОТБ мазкур келишув бўйича маслаҳатчи сифатида Халқ таълими вазирлигига хусусий ҳамкор танлашда кўмак беради. Хусусий ҳамкор биноларни бошқаради, давлат сектори эса таълим хизматларини кўрсатади.

Таълим хизматлари сифатини ошириш ҳамда таълим муассасаларида ўқув муҳитини модернизация қилиш бўйича Ўзбекистон ҳукумати олдига улкан мақсад қўйилди. Шунингдек, у таълим муассасаларини қуриш, реконструкция қилиш ва таъмирлаш, компьютер, ўқув қуроллари билан жиҳозлаш, касб-ҳунар таълими иш берувчилар эҳтиёжларига жавоб беришини таъминлаш орқали таълим муассасаларини мустаҳкамлаш бўйича мақсадли чора-тадбирларни амалга оширишни режалаштирмоқда.

ОТБ маслаҳат хизматлари хусусий сектор олдига аниқ мақсадлар қўйган ҳолда Тошкентдаги умумтаълим мактабларини қуриш ва реконструкция қилишда хусусий секторнинг қандай иштирок этишини намойиш этишга ёрдам беради. Хусусий шериклар, шунингдек, узоқ муддатли истиқболда қурилиш ишларининг юқори стандартларини таъминлашга ҳамда соҳани қўллаб-қувватлаш учун қўшимча инвестициялар ва халқаро тажрибаларни жалб этишга ёрдам беради. ОТБ, ўз навбатида, ушбу пилот лойиҳани таъминлаш учун мактаблар учун намунавий шартномаларни ишлаб чиқади.

Ўзбекистон 1995 йилда ОТБга аъзо бўлганидан буён банк умумий қиймати 8,6 миллиард долларга тенг 78 та кредит, жумладан, хусусий секторга 225 миллион долларлик иккита кредит ажратди. Шунингдек, ОТБ 6 миллион долларлик капитал қўйилмалар, 218 миллион долларлик кафолатлар ва 97,7 миллион долларлик техник ёрдам грантлари ажратди.