«Яндекс. Хариталар»да Ўзбекистон шаҳарларининг суратлари тақдим этилди.
Ўзбекистонга куз фаслида панорам мобил — томида махсус фото ускунаси бўлган машина келган эди. У Тошкент, Бухоро, Нукус, Самарқанд, Хива ва Шаҳрисабз кўчаларини суратга олди, шунингдек, Қорақалпоғистон бўйлаб саёҳат қилди: Устюрт платоси, Орол денгизи ўрнидаги саҳро ва Амударё соҳилидаги қадимий аҳоли яшаш манзилларини тасвирга олди.
Эндиликда манзараларни «Яндекс.Хариталар»да кўриш мумкин — фойдаланувчилар ушбу ҳудудларга виртуал саёҳат қилиши мумкин.
Панорамалар маҳаллий аҳолига нотаниш ҳудудга саёҳатни режалаштиришда, сайёҳларга эса саёҳатга янада яхшироқ тайёргарлик кўришга ёрдам беради. Суратлар ёрдамида транспортнинг қийин ўтиш жойларидаги ҳаракатланишни тушуниш, жойларни белгилаш ва диққатга сазовор жойларнинг қандай кўринишини олдиндан билиб олиш мумкин. Масалан, Самарқанддаги Гўри-Амир мақбараси, Бухородаги Арк қалъаси ёки қадимий Хивадаги карвонсаройларни.
«Биз панорамаларни октябрь ойининг ўрталаридан ноябрь ойининг бошларига қадар суратга олдик: ушбу вақтда жазирама иссиқ ҳам бўлмайди, ёруғлик ҳам кузга хос, яъни унчалик ўткир эмасди. Суратга олиш жараёнига олдиндан жиддий тайёргарлик кўрилган. Ўзбекистон қадимий обидалар ва бетакрор табиий ландшафтларга бойдир ва биз панорамаларда иложи борича кўпроқ диққатга сазовор жойларни қамраб олинишини хоҳлардик. Маршрутни тузиш ва саёҳатни ташкиллаштиришда Ахборот технологиялари ва коммуникацияларини ривожлантириш вазирлиги ҳамда Ўзбекистон Республикаси Туризмни ривожлантириш давлат қўмитаси ёрдам беришди. Суратга олишда кўрсатган ёрдамлари учун улардан миннатдормиз», — дейди Яндекснинг Ўзбекистон бўйича минтақавий директори Евгений Лукянчиков.
Туризмни ривожлантириш давлат қўмитаси раиси вазифасини бажарувчи Абдулазиз Оққулов Яндекс’нинг ушбу лойиҳаси ҳақида қуйидагича фикр билдиради:
«Яндекс.Хариталар» — Ўзбекистон шаҳарларининг кўча панорамаларини қўшган энг йирик географик ахборот хизматларидан бири. Суратларда мамлакатнинг диққатга сазовор жойларини, жумладан, UNESCOнинг Жаҳон мероси рўйхатидаги объектларни кўришингиз мумкин: Ичанқалъа, Шаҳрисабзнинг тарихий маркази ва бошқалар. Дунёнинг исталган бурчагидан кўринадиган панорамалар, Ўзбекистонга саёҳат қилишни режалаштирганлар учун катта ёрдам беради».
Яндекс суратга олиш гуруҳи Ўзбекистонга сафари давомида деярли 295 минг фотосурат олди, улардан 73 мингдан ортиқ юмалоқ панорамалар ҳосил бўлди. Суратга олишнинг умумий масофаси икки минг километрдан ошади. Автомобильда ҳаракатланишнинг иложи бўлмаган жойларда операторлар камерани штативга ўрнатиб, пиёда юрди.
Шу тарзда Нукус шаҳридаги И.В.Савицкий номидаги давлат санъат музейи ва Тошкент шаҳридаги янги Tashkent City боғи суратга олинди.
«Яндекс.Хариталар»да ҳаммаси бўлиб Россия, Арманистон, Беларусь, Қозоғистон, Ўзбекистон, Украина ва Туркиянинг тўрт миллиондан ортиқ панорамалари нашр қилинган. Бу ҳам шаҳарлар, ҳам табиатнинг диққатга сазовор жойлари: Байкал кўли, Карелия шаршаралари, Кавказ тоғлари, Арктика ороллари ва ҳатто сайёранинг энг баланд чўққиси — Эверест каби.
Панорамаларни yandex.ru/maps ва «Яндекс.Хариталар» иловасида кўриш мумкин. Сайт эгалари Maps APIдан фойдаланиб, ҳар қандай панорамани ўз манбаларига жойлаштиришлари мумкин.
Изоҳ (0)