Facebook ижтимоий тармоғида «Қўқонда сирли ўлим қотиллари кимлар...» сарлавҳали мақола тарқалди. Унда Қўқон шаҳри, Истиқлол кўчасидаги уйда яшаган 29 ёшли Фурқатжон Абдуназаровнинг ўлими ва воқеа юзасидан мурожаатларга давлат органлари жавоб бермаганига норозилик баён этилган.
Унда айтилишича, Фурқатжон Абдуназаров Қўқондаги фестиваль якунида, яъни 15 сентябрь куни ўртоқлари Т.Р. ва Э.Р. билан бирга хонадонлардан бирига қандил ўрнатиб бериш учун чиқиб кетган. Бироқ ўша куни кечаси уни кимдир уйига ташлаб кетган. «Фурқатжоннинг ёнидаги телефони ва пулларини тополмадик», деган унинг онаси.
Шунингдек, хабарда айтилишича, ўша кечаси Фурқатжонга кимдир 40 та «Анаприлин» таблеткасини ичирган. Уйқуси келаётганини, боши айланаётганини айтишга улгурган Фурқатжон 16 сентябрга ўтар кечаси вафот этган. Мазкур воқеадан кейин Фурқатжоннинг онаси экспертизага, Қўқон шаҳар ИИБга, прокуратурага, порталга бир неча бор мурожаат қилган, лекин улардан жавоб олмаган. Шу сабабли ижтимоий тармоқ орқали журналистларга мурожаат қилишга мажбур бўлган.
Ушбу воқеа юзасидан Фарғона вилояти прокуратураси расмий баёнот берди. Қайд этилишича, Фурқат Абдуназаровнинг ўз яшаш хонадонида тўсатдан вафот этганлиги ҳолати юзасидан Қўқон шаҳар прокуратураси томонидан терговга қадар текширув ўтказилган.
Суд-тиббий экспертиза хулосасида марҳум Фурқат Абдуназаровнинг ўлими тромбоз касаллиги, ўпка артерия қон томирларининг тромбоэмболияси оқибатида ўткир нафас ва юрак-қон томир етишмовчилиги оқибатида келиб чиққанлиги кўрсатилган. Шунингдек, марҳум Фурқат Абдуназаров ҳаётлик вақтида тромбоз, ўпка артериясининг қон томири тромбоэмболияси билан касалланганлиги, айнан шу касаллик унинг ўлимига бевосита сабаб бўлганлиги баён этилган.
Марҳумдан олинган қон намуналари таркибидан дори воситалари топилмаган. Р.Т. ва Р.I. 2019 йил 15 сентябрда ўртоғи Фурқат Абдуназаров билан бирга соат 20:00 ларда кўришиб, бирга пиво ичгани, Фурқат Абдуназаров маст бўлиб қолганлиги сабабли соат 23:00 ларда Р.Т. уни яшаш хонадонига олиб бориб ташлаб келганлиги, Фурқат Абдуназаров бирор-бир дори воситаси истеъмол қилмаганлигини, уларнинг ўртасида бирор-бир жанжал бўлмаганлигини билдирган.
Текширув натижаларига кўра, Фурқат Абдуназаровнинг вафот этганлиги ҳолатида бирон-бир шахснинг ҳаракатларида жиноят таркиби мавжуд эмаслиги сабабли 2019 йил 15 октябрда жиноят иши қўзғатиш рад этилган ҳамда бу ҳақда марҳумнинг яқин қариндошларига маълум қилинган.
Изоҳ (0)