Қозоғистон шимолидаги Павлодар вилоятида полициячилар маҳаллий аҳолини қарта ўйинлари билан алдаб келган фирибгарлар гуруҳини қўлга олди, деб хабар беради «Pavon.kz».
Гумонланувчилар ўз қурбонларини шаҳар бозорларидан қидирган. Гуруҳ аъзоларидан бири харидорлар олдига келиб, уни қизиқтирадиган товар омборда борлигини билдирган. Шу вақт уларнинг олдига яна бир неча одам келиб, уларга ҳам худди шу товар зарурлигини маълум қила бошлайди.
Шундан кейин улар машинада омбор томон йўл олади, фирибгарлардан бири товарни олиб келгани жўнаган пайтда бошқалар қурбонга вақтни ўтказиш учун пулга қарта ўйнашни таклиф этади. Шубҳани йўқотиш учун қурбоннинг ютишига бир неча бор йўл қўйиб берилади. Орада кимдир тикилган пулни кўтаришни таклиф қилади, иштирокчилардан бири ҳеч нимадан шубҳа қилмаган ўйинчига қарз беришга ҳам рози бўлади. Натижада товар учун келган мижоз ютқазиб, катта миқдорда қарз бўлиб қолади.
Полициячиларнинг маълумотларига кўра, фирибгарлар камида икки нафар павлодарликни алдашга улгурган. Улардан бири миллион тенге (2,6 минг доллар), иккинчиси 30 минг тенге (78 доллар) ютқазган. Қолган жабрланувчиларни қидириш ишлари олиб борилмоқда.
Фирибгарликда гумонланаётган икки нафар шахс Павлодарда, яна тўрт нафари Экибастузда қўлга олинган. Қўлга олинган шахслар 40—70 ёш оралиғида. Уларнинг беш нафари Ўзбекистон фуқароси бўлса, бир нафари қозоғистонлик. Ҳозирда судга қадар суриштирув ишлари олиб борилмоқда. Қозоғистон Жиноят кодексининг 190-моддасига (Фирибгарлик) кўра, уларнинг айби исботлангудек бўлса, ўн йилгача озодликдан маҳрум этилиши мумкин.
Изоҳ (0)