Ўзбекистон Туризмни ривожлантириш давлат қўмитаси томонидан тайёрланган туризм соҳасини янада ривожлантиришга қаратилган Президент фармони лойиҳаси мамлакатда авиачипталар нархини арзонлаштирувчи чора-тадбирларни ҳам кўзда тутади. Ҳужжат лойиҳаси жамоатчилик муҳокамаси учун эълон қилинган.
Фармон лойиҳасига кўра, маҳаллий ва хорижий компанияларни олиб кирилган авиаёқилғи ва ёқилғи-мойлаш материаллари, шунингдек, авиаёқилғи ва ёқилғи-мойлаш материаллари тайёрлаш мақсадида олиб келинадиган хом ашё учун бир неча йилга божхона тўловларидан озод қилиш режалаштирилмоқда.
Шунингдек, хорижий авиакомпаниялардан транзит вақтида кўрсатилган аэронавигация хизматлари бўйича муддати ўтган дебиторлик қарзлари учун жарима олишни тўхтатиш кўзланмоқда.
Ўзбекистоннинг резидент авиакомпанияларини эса ишлаб чиқарилганига 10 йил тўлмаган, ТИФ товар рақами 8802, 8803 ва 8805 бўлган самолётларни олиб кирганлик учун божхона божларидан озод қилиш режалаштирилмоқда. Бундай имтиёзни фақат мижозларга хизмат кўрсатиш учун ишлатиладиган дунё брендларининг алкоголь маҳсулотлари ва хизмат кўрсатиш жиҳозларига ҳам қўллаш таклиф қилинмоқда.
Ҳаво кодексига эса қайтарилмайдиган ва юксиз тарифлардан фойдаланган ҳолда авиаташувлар нархини оптимизация қилиш механизмини жорий қилишни кўзда тутувчи ўзгартириш киритиш режалаштирилган.
Изоҳ (0)