Андижондаги портлаш: Шаҳарнинг 2-микрораёнида жойлашган кўп қаватли уйларнинг биридаги хонадонда «қўлбола усулда тайёрланган газни тортиш мосламасида юзага келган чақнаш» оқибатида подезд девори қулаган, камида олтита уй зарар кўрган, саккиз киши эса қўрқиб кетганидан ёрдам сўраб шифокорларга мурожаат қилган. Воқеа жойига зудлик билан вилоят ҳокими Шуҳратбек Абдураҳмонов етиб борган.
Отабек Умаров қайнонаси Зироатхон Мирзиёевани туғилган куни билан табриклади. Президентнинг кенжа куёви бунгача божаси, божасининг рафиқаси, ўзининг рафиқаси, ўзининг онаси ва фарзандларини ҳам таваллуд кунлари билан ижтимоий тармоқлардаги саҳифалари орқали табриклаган эди.
Ўзбекистонда яқин қариндошларнинг ишончномасиз автомобиль ҳайдаши масаласига расмий изоҳ берилди. Хуллас, рухсат бор, янги намунадаги суғурта полиси бланкалари ҳам тасдиқланган, лекин ўша янги бланкалар йўқ. ИИВ Йўл ҳаракати хавфсизлик хизмати ўзига боғлиқ муаммоларни ҳал қилиб қўйган, энди юриш навбати, кутилмаганда, Молия вазирлигида.
Ўзбекистоннинг бошқа янгиликлари. Ўзбекистоннинг айрим ҳудудларида 5 декабрь куни шамол туриб, ёғингарчилик бўлиши мумкин. Тошкентда мингга яқин автомобиль турадиган бепул «стоянка» ёпилди. Яккабоғдаги мактабда физика ўқитувчиси математикадан, жисмоний тарбия ўқитувчиси эса рус тилидан дарс беряпти. Сурхондарё ҳокими депутатликка номзодлар рўйхати аралашгани ҳақидаги хабарларни рад этди. Наманганда 2019 йил бошидан тўққизинчи уч эгизак туғилди. Тошкентда иссиқ сув қувурларининг ёрилиши оқибатида Шайхонтоҳур, Чилонзор ва Учтепа аҳолисининг бир қисми иссиқлик таъминотисиз қолди.
Дунё янгиликлари. Тожикистон ўз аҳолисини таъминлаш мақсадида электр энергиясини Ўзбекистонга экспорт қилишни бутунлай тўхтатди. Ироқда ИШИД етакчисининг ўринбосари қўлга олинди. Эрон мамлакатдаги намойишлар оқибатида кўрилган зарарни АҚШга қоплатмоқчи. Google асосчилари Ларри Пейж ва Сергей Брин Alphabet’нинг раҳбарлик лавозимларини тарк этди.
Ўқиш ва томоша қилишни қатъий тавсия қиламиз:
Изоҳ (0)