«Бунёдкор» футбол клуби иккита легионер футболчиси билан хайрлашди. Бу ҳақида клуб расмий сайтида маълум қилинди.
«Бунёдкор»ни украиналик Евгений Чумак ҳамда россиялик Дмитрий Островский тарк этди. Клуб раҳбарияти футболчилар билан учрашган ва томонлар ўзаро келишувга кўра шартномани узайтирмаслик қарорига келган. «Бунёдкор» футболчилар билан тўлиқ ҳисоб-китоб қилган.
«Очиғи, шундай шароитга эга клубда тўп сурганимдан хурсандман. Академия, майдонлар, асосий стадион — тўғриси, илк бор кўрганимда шок ҳолатига тушган эдим. «Бунёдкор»ни Чемпионлар Лигасининг саралаш босқичига йўл олгани билан табриклайман! Жамоа гуруҳ босқичига чиқишига тилакдошман!», — дейди Евгений Чумак.
«Аввало клубда ишлаётган барчага ўз миннатдорчилигимни билдираман, хусусан мураббийлар штабига. Улар билан яхши даврларни ўтказдим. «Бунёдкор»да мураббийлардан тортиб, шифокору, уқаловчиларгача ҳамма ўз ишининг устаси экан. Шунинг учун бу ерда ўтказган вақтимга ачинмайман. Раҳбарият ойлик-маошларимизни бериб, биз билан ҳисоб-китоб қилди», — дейди Дмитрий Островский.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)