Ўзбекистон ногирон-ампутантлар футбол терма жамоаси билан тўрт карра Жаҳон Чемпионлигини қўлга киритган мутахассис Рустам Қориев 68 ёшида оламдан кўз юмди. Бу ҳақда Жисмоний тарбия ва спорт вазирлигиматбуот хизмати маълум қилди.
Рустам Қориев 1951 йил 15 январда Сурхондарё вилоятида туғилган. Ўрта мактабни тугатгач, ҳарбий сифатида фаолият олиб борган ва капитан даражасигача кўтарилган.
Қориев 1988 йилда Афғонистондаги жангларда жароҳатланиб, ногирон бўлиб қайтган собиқ ҳарбийлардан иборат «Матонат» ногирон-ампутантлар жамоасини тузади. 1998 йилда жамоанинг номи «Байналминал»га ўзгартирилди.
Шу вақт давомида «Байналминал» жамоаси 11 карра Россия очиқ чемпионати ғолиби, кўп бора «Рождество кубоги», икки карра МДҲ кубоги соҳибига айланган. Бундан ташқари, асосини «Байналминал» жамоаси аъзолари ташкил этган Ўзбекистон терма жамоаси тўрт карра Жаҳон Чемпионати ғолиблигини қўлга киритади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)