«Дарё» ижтимоий ҳаётда ўз ўрнига эга, бироқ жамоатчилик эътиборидан кўпинча четда қолаётган касб эгалари билан суҳбат қилмоқда. «Соядаги одамлар» лойиҳасининг бу галги қаҳрамони ўн беш йилдан буён Тошкентда кондукторлик қилиб келаётган аёл.
Суҳбатнинг аудио шаклини «Дарё»нинг YouTube’даги каналида кўришингиз мумкин.
Ўтган ҳаётимни батафсил ҳикоя қиладиган бўлсам, асли тожикистонликмиз. Онам опам иккимизни бир ўзи катта қилган. Онам кучли ҳуқуқшунос эди. Давлат органларида катта-катта лавозимларда ишлаган. Лекин мустақиллик йилларида маълум бир сабабларга кўра оиламиз билан Тошкентга кўчиб келганмиз.
Онам рўзғор тебратиш учун кондуктор бўлиб ишга кирган. Кейин мени ҳам ёнига ишга чақирган. Бир муддат ўтиб турмушга чиқдим. Хўжайиним ҳам автобус ҳайдовчиси эди. Адашмасам, 5—6 йилча бирга ишладик. Кейин нафақага чиқди. Мен эса ўз жойимда қолдим.
Кун тартибим
Ҳар куни соат 3:00 да уйғонаман. 4:00 ларда автосарой машинаси бизни олиб кетади. 4:30 ларда ишхонага бориб чипталарни оламиз, шифокорлар кўригидан ўтамиз. Соат 5:00 да биринчи график бўйича ишга чиқиб кетамиз. Шу билан соат 9:00-10:00 гача ишлаймиз.
Ишим ҳақида
График асосида ишлаймиз. Масалан, бир кун ишлаб, бир кун дам оламиз. Ёки уч кун ишлаб, кейинги кун ишга чиқмаслигимиз мумкин. Ойига белгиланган соатни тўпласак бўлди. Биз ҳам ҳайдовчиларга ўхшаб режа топширамиз. Мисол учун, ўтган ойники 172 соат эди. Ноябрь учун эса 174 соат берилган. Бир кун ишлашимиз 14 соатга ҳисобланади. Белгиланган соатни йиғолмасак, ойлик яхши чиқмайди.
Авваллари иложи борича ҳар кун ишлашга ҳаракат қилардим. Лекин доим тик оёқда ишлаганимиз учун ёшим ўтгани сайин чарчаб қоляпман. Ойлигим 1 миллион атрофида чиқиб турибди.
Одамларнинг гапларига эътибор бермайман
Биринчи иш бошлаган пайтларим йўловчиларнинг муомаласидан қаттиқ хафа бўлардим. Шунда турмуш ўртоғим «хафа бўлманг, ҳаётда ҳар хил одам бор, кўнглингизга олмасликни ўрганинг», деб кўп тушунтирган. Секин-секин ҳаммасига кўникканман.
Ҳақиқатан ҳам одамлар автобусга ҳар хил кайфиятда чиқади. Кимдир жанжаллашган, кимнингдир муаммоси бор. Баъзиларга битта гап кам, иккитаси ортиқ. Келишмовчилик бўлиши табиий.
Масалан, ёшлар катта инсонларга жой бермаса, туринглар, жой беринглар дейман. Биламан, баъзиларига ёқмайди. Лекин ота-онангиз автобусда шунақа чарчаб, тик оёқда кетиши хоҳлайсизми, деб ётиғи билан тушунтиришга ҳаракат қиламан.
Мен билан қаттиқ тортишганлар ҳам, узр сўраганлар ҳам бўлган. Нима бўлишидан қатъи назар, ҳеч нарсага парво қилмайман, кўнглимга олмайман.
Иложи борича шунақа вазиятларда уришмасликка, тортишмасликка ҳаракат қиламан. Мендан ўтган бўлса узр, дейман.
Инсонларга яхши муомала ёқади. Ҳурмат қилиб яхши гапирсангиз, у ҳам сизга шундай муносабатда бўлади. Ёши каттами, кичикми фарқи йўқ. Ким автобусга чиқса, кулиб гапираман. Кейин улар ҳам кулиб гапиради.
Касбимни яхши кўраман. Тўғри, одамлар билан ишлаш қийин, лекин менга ёқади. Ҳатто 2—3 йил олдин бир инсон порталга менга атаб миннатдорлик хати юборган.
Анча йил олдин бошқа йўналишда ишлардим. Кўча-кўйда юрганимда баъзи йўловчилар мени таниб, нега кўринмаётганимни сўрайди. Бошқа йўналишга ўтиб кетдим деб айтаман.
Ёзда ишлаш қийин бўлади
Ҳар бир автобуснинг кунлик режаси бор. Масалан, ҳафта бошида 660 минг топширишимиз керак. Дам олиш кунлари «план» камроқ қўйилади.
Очиғи, ёзда ишлаш қийин бўлади. Чунки ҳамма таътилга чиқади ёки иссиқда ишламай дам олади. Шунинг учун ёзда планни бажаролмасдан қийналамиз.
Белгиланган «план»дан ортиқроқ пул тушса, масалан, 30 минг ортса, ҳайдовчи менга 10 минг бериб, ўзига 20 минг олиши мумкин. У ҳам машинанинг «расход»идан ортмайди.
Оилам ҳақида
Бир ўғил, бир қизим бор. Ўғлим туризм коллежини битириб, Тошкентдаги катта бир меҳмонхонада ишлаяпти. Насиб қилса, баҳорда уйлантирамиз. Қизим эса яқинда мактабни битиради. Хорижий тилларни яхши билади. Келажакда таржимон бўлмоқчи.
Фарзандларим ким бўлишидан қатъи назар одамларга меҳрибон, яхши инсонлар бўлиб вояга етсин. Ҳаётда йўлини топиб, бизга раҳматлар олиб келадиган инсонлар бўлсин.
Ўзбекистон фуқароси бўлишни истайман...
20 йилдан буён Ўзбекистонда рухсатнома билан яшаб келаман. Биринчи ниятим Ўзбекистон фуқаролигини олиш. Мана яқинда сайлов бўлади. Лекин бошқалар қатори овоз беролмайман. Чунки на тожикистонликман, на ўзбекистонлик... Нейтрал одамман. Ўзбекистон фуқаролигини олишни жуда хоҳлайман, лекин... ололмасам-чи, деган ҳадик билан топширишга иккиланиб турибман.
Ахир шунча яшаб, шунча ҳужжат тайёрлаб топширсам-у, беришмаса одамга алам қилади-да. Лекин Янги йилдан кейин бир ҳаракат қилиб кўрмоқчиман. Ўзбекистон паспортини олсам, мендан бахтли одам бўлмасди...
Хонзодабегим Аъзамова суҳбатлашди.
Аввалги соядаги одамлар:
«Онамга қасд қилиб, ҳаётимни барбод қилдим». Адашган қиз ҳикояси«Давлат идораларининг ҳадеб текширавериши ёқмайди». Этикдўз ҳикояси
«Аравакашлик қилиб, қизимни ТошМИда ўқитдим». Аравакаш амаки ҳикояси
«Тушимда марҳум эрим тинмай оловда ёнарди». Гулчи аёл ҳикояси
«Мусорга ташлаб юборилган 34 миллион сўмни топиб берганман». Чиқинди йиғувчи амаки ҳикояси
Моделлар бойларга жазман бўладими? Модель қиз ҳикояси
«Тиланчилар таксида, ўқитувчилар автобусда юрадиган замонда яшаяпмиз». Киракаш йигит ҳикояси
«Бой ўлса ўлсин, камбағал ўлмасин». Гўрков Юрсунали ота Умаралиев ҳикояси
«Менга ҳеч нарса керакмас, шунчаки бахтли бўлишни хоҳлайман». Мардикорлик қилаётган қиз ҳикояси
«Ўзбекистон ўликхоналарида мурдалар сотилмайди!» Морг ходимининг ҳикояси
«Официантлар қўпол мижозларнинг овқатига тупуриб беришини эшитганман». Официант йигит ҳикояси
Изоҳ (0)