Қонунчилик палатасининг Фан, таълим, маданият ва спорт масалалари қўмитасида «Таълим тўғрисида»ги қонун лойиҳасининг янги таҳрири иккинчи ўқишда кўриб чиқишга тайёрланмоқда.
Палата матбуот хизматининг хабарига кўра, мазкур қонун лойиҳаси 2019 йилнинг 6 сентябрида Қонунчилик палатаси томонидан биринчи ўқишда қабул қилинган. Уни иккинчи ўқишга тайёрлаш жараёнида депутатлар, таълим соҳасида фаолият олиб борувчи экспертлар ва мутахассислардан иборат ишчи гуруҳи томонидан кенг кўламли иш олиб борилди. Қонун лойиҳаси концептуал маъқулланганидан кейин парламент қуйи палатаси расмий веб-сайтига кенг муҳокамадан ўтказиш учун жойлаштирилган.
Шу муносабат билан ишчи гуруҳ Қонунчилик палатасига фуқаролардан ва таълим муассасалари вакилларидан келиб тушган таклифларни ўрганган. Ишчи гуруҳ аъзолари уларни таҳлил қилиб, умумлаштирмоқда. Шу аснода қонун лойиҳасига тегишли ўзгартириш ва қўшимчалар киритилмоқда. Ҳаволаки нормалар чиқариб ташланмоқда.
Қонун лойиҳасида таълим хизматларининг кундузги, кечки, сиртқи, масофавий, давлат ва нодавлат таълим муассасаларида дуал таълим олишнинг янада кенгроқ кўламини тақдим этиш кўзда тутилган.
Қонунчилик палатаси депутати, Фан, таълим, маданият ва спорт масалалари қўмитаси аъзоси Одинахон Жамолиддинованинг фикрича, қонун лойиҳасининг янги таҳрири билан таълим олувчиларни ва педагог кадрларни таълим фаолияти билан боғлиқ бўлмаган бошқа ишларга жалб этиш тақиқланади.
Шунингдек, қайд этилишича, таълим соҳасидаги давлат бошқарув органларининг ваколатлари ва таълим муассасаларининг фаолияти эркинлиги кенгайтирилмоқда. Ундан ташқари, қонун лойиҳаси ушбу соҳада давлат бошқаруви органлари ваколатларини кенгайтиришга ҳамда таълим муассасалари фаолиятида мустақилликни оширишга хизмат қилади.
Изоҳ (0)