Ўзбекистон Президенти Шавкат Мирзиёев 28 ноябрь, пайшанба куни мамлакатга амалий ташриф билан келган Туркманистон президенти Гурбангули Бердимуҳамедовни қабул қилди. Бу ҳақда Президент матбуот хизмати хабар берди.
Давлат раҳбарлари икки томонлама муносабатларнинг долзарб масалаларини кўриб чиқди ва уларни кенгайтириш истиқболларини муҳокама қилди.
Ўзбекистон ва Туркманистон ўртасидаги стратегик шериклик даражасига кўтарилган кўп қиррали ҳамкорлик жадал ривожланиб бораётгани катта мамнуният билан қайд этилди.
Музокаралар чоғида амалий ҳамкорлик масалаларига, жумладан, ўзаро савдони кўпайтириш, машинасозлик, энергетика, транспорт, қишлоқ хўжалиги ва бошқа устувор тармоқларда қўшма лойиҳаларни амалга оширишга алоҳида эътибор қаратилди.
Ҳудудлар ўртасида, шунингдек, маданий-гуманитар соҳада фаол алоқаларни давом эттириш муҳимлиги қайд этилди.
Давлат раҳбарлари халқаро ва минтақавий аҳамиятга молик масалалар юзасидан ҳам фикр алмашди.
Ўзбекистон ва Туркманистон президентлари Тошкентда ўтказиладиган Марказий Осиё давлат раҳбарларининг иккинчи Маслаҳат учрашуви минтақада дўстлик, яхши қўшничилик ва шериклик муносабатларини мустаҳкамлашга хизмат қилиши хусусида якдил фикр билдирди.
Музокаралардан сўнг икки давлат раҳбари Туркманистон президентининг китоблари ва илмий асарлари кўргазмаси билан танишди.
Таъкидланишича, ушбу китоблар Ўзбекистон илмий-академик доиралари ва ижодий жамоатчилигида катта қизиқиш уйғотган. Мазкур ташриф арафасида Гурбангули Бердимуҳамедовнинг қатор китоблари — «Бахтли ҳаёт соғлиқдан бошланар», «Маданият — халқнинг бебаҳо хазинаси», «Барҳаёт афсона», «Чой — шифо ва руҳий қувват манбаи» номли асарлари ўзбек тилига таржима қилиниб, чоп этилган.
Шавкат Мирзиёев Туркманистон президентига унинг Ўзбекистонда чоп этилган китобларининг илк нусхаларини совға қилди.
Изоҳ (0)