Беларуслик журналистлар ўзбек ҳамкасблари ва бефарқ бўлмаган фуқаролар ёрдами билан Гродно шаҳрида ўрнатилган ёдгорлик танкида 1967 йилда қайднома қолдирган Чори Эшбоевни топди, деб ёзади «Қашқадарё янгиликлари».
Чори Эшбоев ҳозирда 73 ёшда, у Сурхондарё вилоятида яшайди.
Эшбоевни топишга биринчи уриниш Беларуснинг «Ҳродно» нашри ходимлари томонидан ёзда амалга оширилди, бироқ у муваффақиятсиз якунланди.
Ноябрь ойида журналистлар қидирувни давом эттирди. Ижтимоий тармоқлардаги маълумотлар дарҳол тарқалди ва бир кундан кейин натижа берди.
Эшбоев 1965—1968 йилларда Беларусда танкларни таъмирлаш билан шуғулланадиган ҳарбий қисмда хизмат қилганини сўзлаб берган.
Шу билан бирга, аскарлар Иккинчи жаҳон уруши жангларида иштирок этган ҳарбий машиналарга атаб ёдгорликлар ўрнатган.
Эшбоев авлодлар учун қайднома қолдиришга қарор қилди. У ёдгорлик танкини ўзбекистонлик аскарлар ўрнатганини одамлар билиши учун «Ўзбек халқининг ўғли Чори Эшбоев» дея қайднома қолдирди.
Эшбоев хизматдош дўстларининг исмларини эслай олмайди, чунки орадан 50 йилдан ортиқ вақт ўтди. Бироқ, унинг хотирасида подполковник Сидоровнинг исми сақланиб қолган.
Чори Эшбоев Беларусдан уйга қайтгач, 30 йилдан ортиқ сув хўжалиги ташкилотида ҳайдовчи бўлиб ишлаган. 2004 йилда муваффақиятсиз ўтказилган операциядан сўнг у бутунлай кўр бўлиб қоган. Шу воқеадан уч йил ўтиб, унга биринчи гуруҳ ногиронлиги белгиланган. Отахон 1 миллион 400 минг сўм пенсия олади.
Унинг ўғли Бунёднинг айтишича, жорий йилнинг ёзида маҳаллий ҳарбий қисм орқали Эшбоевни Гродно шаҳри кунига таклиф қилишган. Бироқ отахон соғлиғи туфайли Беларусга учиб бора олмаган.
Изоҳ (0)