Бош прокуратура ҳузуридаги департаментнинг Олмалиқ шаҳар бўлими томонидан ўтказилган терговга қадар текширувда Олмалиқ шаҳар молия бўлими мудири собиқ ўринбосари И.С. (ҳозирда Оҳангарон шаҳар молия бўлими мудири ўринбосари) мансаб мавқейини суиистеъмол қилиб, «Т.М.» МЧЖга таъсисчилик қилгани аниқланди. Бу ҳақда «Дарё»га Бош прокуратура матбуот хизмати маълум қилди.
У ушбу корхонани норасмий бошқариб, бюджет ташкилотларига нархи 493 миллион сўмлик маҳсулотларни 591,2 миллион сўмга қиммат нархда ўтказиб, 98,1 миллион сўм бюджет маблағларини талон-торож қилган.
Корхона ҳисоб рақамига келиб тушган 977,8 миллион сўмни корпоратив пластик картасига ўтказиб, ўз эҳтиёжлари учун сарфлаб юборган ҳамда бюджетга тўланиши лозим бўлган 221,5 миллион сўм даромад солиғини тўлашдан қасддан бўйин товлаган.
Шунингдек, И.С. ноқонуний даромадларини қонунийлаштириб, мулкка айлантириш мақсадида Gentra ва Damas русумли автомашиналарни харид қилиб, жиноий фаолиятдан олинган даромадларини легаллаштирган.
Мазкур ҳолат юзасидан И.С. ва бошқаларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)