Ҳуқуқшунос ва блогер Хушнудбек Худойбердиев ўзининг Telegram каналида ёзишича, 22 ноябрь куни «Тошкент—Қоракўл» йўналишида қатновчи автобус Самарқанд вилоятида бузилиб қолган ва анча вақт ўтишига қарамасдан йўловчиларга ҳеч қандай ёрдам кўрсатилмаган.
Блогернинг хабари остига шундай изоҳ қолдирилган:
«Ассалому алайкум, хайрли кеч, мавзудан ташқари битта илтимосим бор эди. Ўзизга қандай бўғланишни билолмаганим учун бу ерга ёзяпман. ‘Тошкент—Қоракўл’ йўналишидаги автобус Самарқанд вилоятида бугун соат 17:00 атрофида бузилиб қолди. Ҳайдовчи йўқ, кетган уста олиб келаман, деб ҳалигача дараги йўқ. МЧСга тел қилинди, аммо ҳеч кимдан хабар йўқ, қанча одамлар совуқда қолиб кетяпти камига йўловчилар тушлик ҳам қилишмаган»
Блогернинг ўзи ҳам автобусдаги йўловчилардан бири билан гаплашган (97) 280-01-02 рақам орқали.
«Ҳақиқатан, автобус бузилиб қолган ва усталар келишмаган. Автобусда 40 нафарга яқин йўловчилар бор. Совуқда қолиб кетишибди. Автобуснинг бузилиб қолган жойи тахминан Тошкентдан Каттақўрғон туманига кираверишга яқин (‘Каттақўрғон’ деган катта ёзувга етмасдан).
Мутасаддилар билан боғланиб, ушбу масалани тезда ҳал қилишга ҳаракат қиламиз. Шу атрофдан ўтувчилар ёки шу атрофда яшовчилар бўлса, сизлар ҳам ёрдам кўрсацангиз ёмон бўлмасди. Ҳаво кескин совиб кетган бир пайтда тезроқ чора кўрилгани ҳар томонлама яхши», — деб ёзади Хушнудбек Худойбердиев.
Орадан бироз вақт ўтгач, блогер Telegram канали орқали Самарқанд йўлида бузилиб қолган автобус масаласида тегишли мутасаддилар билан боғлангани, зудлик билан ёрдам бериш чораларини кўриш бошлангани ҳақида ёзиб қолдиган.
«Барчага эътибор учун раҳмат. Дуоларингизда йўловчи юртдошларимизни эслаб қўйинг, манзилларига эсон-омон етиб олишсин, илоҳим», — дейилади хабарда.
Изоҳ (0)