Бекмурза Диланов, Олий Мажлис Қонунчилик палатаси депутатлигига номзод: «Бир синфда 40 та ўқувчи билан сифатли таълимни талаб қилолмаймиз»
Биз илгари сураётган фикрлардан бири ижтимоий давлат ғоясидир. Ижтимоий давлат деганда, ижтимоий соҳага жуда катта эътибор қаратиладиган, фуқароларнинг тенглиги, уларнинг турли табақаларга ажралишига йўл қўймайдиган, умумфаровонлик таъминланган жамият тушунилади.Ҳаттоки айрим ривожланган Европа мамлакатларида давлатнинг ижтимоий мақоми Конституция даражасида мустаҳкамланган. Масалан, Германия Конституциясида унинг ижтимоий давлат эканлиги белгиланган.
Бизда мамлакатимизнинг ижтимоий давлат сифатидаги мақоми асосий қонунда кўрсатилмаган бўлса-да, бу соҳада амалга оширилаётган ислоҳотлар ижтимоий давлатларникидан кам эмас. Ўн йиллардан буён ҳар йили давлат бюджети маблағларининг эллик фоиздан ортиғи ижтимоий соҳаларга йўналтирилаётганининг ўзи ҳам буни яққол исботлайди.
Фикримизча, ижтимоий соҳа, айниқса, таълим соҳасига ажратилаётган маблағлар миқдори янада оширилиши зарур. Чунки сифатли таълимсиз, етук кадрларсиз буюк келажакни тасаввур этиб бўлмайди. Шу жиҳатдан биз парламент аъзолари келгуси йил давлат бюджетини тасдиқлашда бу масалага алоҳида эътибор қаратмоғимиз зарур деб ҳисоблаймиз.
Конституциямизда фуқароларга таълим олиш ҳуқуқи берилдими, энди уни таъминлаш чоралари кўрилиши лозим. Мактабгача таълим муассасаларининг сони етарли бўлмаса ёки мактабларда бир синфда 40 та ўқувчи сиқилиб ўтирса ёхуд олий таълим билан қамраб олиш даражаси атиги ўн фоиз атрофида бўлса, қандай қилиб сифатли таълимни, малакали кадрларни талаб қиламиз? Давлат ижтимоий мақомини шу ўринда кўрсатиши зарур. Таълим учун етарли шароитлар яратилиши шарт.
Ойсулув Ўроқова, Олий Мажлис Қонунчилик палатаси депутатлигига номзод: «Бизга адолатли қонунлар керак»
Ўзбекистон «Адолат» социал-демократик партияси навбатдаги сайловларда мамлакатимиз тараққиёти ҳамда халқимиз фаровонлигини таъминлашга қаратилган юздан ортиқ муҳим ташаббуслар қаторида ҳуқуқий ижтимоий давлат барпо этиш ғоясини илгари сурмоқда.
Ҳуқуқий давлат бу – қонун ҳукмрон бўлган, инсон ҳуқуқ ва эркинликлари олий қадрият сифатида тан олинган ва амалда у таъминланган, бошқарувда халқнинг хоҳиш-иродаси ҳисобга олинган, ҳокимият ваколатлари ўзаро тийиб туриш ва мувозанатни сақлаш асосига қурилган демократик макондир. Ҳуқуқий давлатда олий қадрият инсондир. Барча ислоҳотлар инсон манфаатлари, унинг фаровон ҳаёт кечиришига қаратилган бўлиши лозим.
Демак, энг асосий ва муҳим масала бу инсон ҳуқуқ ва эркинликларини таъминлаш экан, бу йўналишда олдимизда қандай вазифалар мавжуд? Фикримизча, энг аввало, адолатли қонунлар, адолатли ҳуқуқий тартибга солиш механизми жорий этилиши лозим. Бу ўринда, устувор масала жамиятдаги энг муҳим ижтимоий муносабатларни қонун билан тартибга солинишига эришмоғимиз даркор. Ҳозирча афсуски, бу борада эришилган натижаларимизни ижобий дея олмаймиз. Чунки ҳуқуқий тартибга солиш майдонида қонунлардан кўра, қонун ости ҳужжатларининг сони ва салмоғи катта. Қонун парламент томонидан қабул қилинади. Парламентда халқнинг хоҳиш-иродасини рўёбга чиқарадиган вакиллар фаолият олиб боради. Моҳиятан, қонун халқона, умумманфаатни ўзида акс эттирган, олий юридик кучга эга ҳужжатдир.
Дилмурод Исмоилов, Олий Мажлис Қонунчилик палатаси депутатлигига номзод: «Нархлар исботсиз оширилмаслиги керак»
Адл дарахтини кўрганмисиз? Мутахассисларнинг айтишича, уни қиргами,қиялик жойгами, сайхонликками, қаерга экишса ҳам, фақат тўғри ўсар, унинг қаддини букишга қайсар табиатнинг ҳам кучи етмас экан. Шунинг учун ҳам, одамлар азал-азалданоқ ўзларининг умр йўллари, ишлари, иқтисодий, маиший, маънавий ҳаётлари ўша дарахтдек тўғри, пок бўлишини истаб, адолатни ардоқлашиб, унга интилиб яшашган.
Бизнинг социал-демократик партиямиз ўз номини шундай деб атаганида, у ўз олдига жамиятимизда ижтимоий адолатнинг мустаҳкамланиши, унинг ҳаётимизнинг ҳамма жабҳаларида устувор бўлиши учун ҳаракат қилишни мақсад қилиб қўйган ва бу партиямизнинг низоми ва дастурида энг асосий вазифа этиб белгиланган эди.
Ҳозир нархлар ва тарифлар, аҳамият беринг, молия вазирлигининг декларациясига биноан оширилаяпти. Нима учун бу иш декларация асосида амалга оширилаяпти? Ахир, декларация дегани баёнот деган маънони беради-ку! Унда эса бу иш нимага асосан ва қандай мақсадда амалга оширилаётгани йўл-йўлакай исботланиб эмас, шунчаки қайд этилиб кетиляпти, холос. Бу ваколат Олий Мажлисга ўтказилгач, ҳар гал нархлар ва тарифлар ўзгарганида, бу ташаббус билан чиққан вазирлик, идора ўз фикрини депутатларга исботлаб бериши, ҳамма ҳисоб-китобларни тақдим этиши, нархларнинг ва тарифларнинг оширилиши халқнинг реал даромадларининг, турмуш даражасининг пасайиб кетмаслигини далиллаб бериши шарт эканлиги белгилаб қўйилса, яхши бўларди.
Реклама ҳуқуқи асосида.
Изоҳ (0)