Қозоғистоннинг Чимкент шаҳридаги 1-сонли касалхона бош шифокори Абилай Донбой инсон тана аъзоларини ноқонуний трансплантация қилганликда иштирок этгани учун қўлга олинди, деб хабар берди Regnum.
Абилай Донбой Қозоғистон жиноят кодексининг икки моддаси — трансмиллий жиноий гуруҳда иштирок этиш ва инсон ички аъзоларини трансплантация қилганликда гумонланмоқда.
Судга қадар суриштирув давомида 2017—2018 йилларда мамлакат ҳудудида инсон ички аъзолари трансплантацияси соҳасида жиноий гуруҳ ноқонуний фаолият юритгани аниқланган. Гуруҳ таркибига бошқа давлат фуқаролари ҳам кирган.
Донор сифатида моддий шароити оғирлиги туфайли ўз аъзоларини сотишга мажбур бўлган Ўзбекистон, Қирғизистон ва Украина фуқаролари жалб этилган. Ички аъзоларни хорижий давлатларнинг, асосан Исроилнинг бадавлат кишилари сотиб олган.
Терговда Абилай Донбой жиноий гуруҳ аъзолари билан тил бириктириб, катта пул эвазига ички аъзоларни кўчириб ўтказиш бўйича ноқонуний жарроҳлик амалиётларини ўтказгани аниқланган.
Мазкур иш доирасида трансплантолог шифокор Гани Куттимуратов ва жиноий гуруҳнинг яна бир аъзоси Қирғизистон фуқароси Б.Т. Тайсалова ҳибсга олинган.
Ҳозирда жиноят ишини судга ошириш чоралари кўрилмоқда.
Изоҳ (0)