YouTube’даги Alter Ego дастури муаллифи Кирилл Альтман Ўзбекистон Сенати раиси Танзила Норбоевадан интервью олди (у аввалроқ Тошкент шаҳар ҳокими Жаҳонгир Ортиқхўжаев, халқ таълими вазири Шерзод Шерматов, Ахборот ва оммавий коммуникациялар агентлиги раҳбари Комил Алламжоновдан ҳам интервью олганди).
Кирилл Альтманнинг: «Амалдорларимиз ўзларининг оммавий шахс эканликларини англаб, ОАВ ва блогерлар кейинчалик тинмай муҳокама қиладиган бемаъни гапларни айтишдан тийилишларига қанча вақт керак?», деган саволига Сенат раиси қуйидагича жавоб берди:
Бу, эҳтимол, тажриба билан келар. Жуда қисқа вақт — уч йил ичида ОАВ учун ҳам, амалдорлар учун ҳам, халқ учун ҳам кескин очиқлик юз берди. Халқ эркин мулоқотни, ўз муаммоларини очиқ айтиш эркинлигини соғинган. Амалдорлар эса бундай мулоқотга ўрганмаган. Шундай экан, уч йил ичида соҳада кўп нарсаларга эришдик, деб ўйлайман. Аммо муаммолар ҳали кўп.Унинг қўшимча қилишича, ҳаммаси «меъёрий даражада изга тушиб кетиши учун» 3—5 йилдан кам бўлмаган вақт талаб этилиши мумкин.Албатта, сиз тилга олган ҳолатлар билан ҳар куни тўқнаш келиш мумкин. Мансабдорларнинг ўрганишига вақт керак, деб ҳисоблайман. Мансабдорларнинг янги авлоди бунга тайёр ҳолда келади. Улар бугун ҳам матбуот, халқ билан жуда фаол мулоқотга киришишга интилмоқда. Биз буни ҳар куни телевидение, ОАВ ва ижтимоий тармоқларда кўриб боряпмиз. Ҳали ҳам қочиб, яшириниб юрган мансабдорлар йўқ эмас, албатта, аммо бу вақтинчалик ҳолат.
Танзила Норбоева, Ўзбекистон Сенати раиси
Сўнгги вақтларда турли даражадаги амалдорлар томонидан билдирилган баҳсли фикрлар жамоатчилик ўртасида фаол муҳокамаларга сабаб бўлди. Хусусан, Фермерлар кенгаши (ва айни вақтда ЎзЛиДеП) раиси Актам Ҳайитовнинг «Кўп гўшт еяпмиз», Халқ демократик партияси етакчиси Улуғбек Иноятовнинг «Беш кишидан иборат оила 2,5 миллион сўмга бир ой яшай олади», энергетика вазири ўринбосари Шерзод Хўжаевнинг «Уйида электри бор одам, қурол кўтариб урушга чиқмайди» каби фикрлари шулар жумласидан.
Изоҳ (0)