4–10 ноябрь кунлари «ЎзРТХБ» АЖда ўтказилган биржа савдо натижаларига кўра, биржа бозорининг турли товар сегментларида нархлар динамикаси турли йўналишлар бўйича шаклланиб борди. Бу ҳақда Товар хом ашё биржаси маълумотларида келтирилган.
Кўриб чиқилаётган давр мобайнида 3898,5 тонна AI-91 русумли бензин биржа савдоларига қўйилган ва шундан 2906,5 тоннаси сотилган. Сўнгги савдо ҳафтасида AI-91 русумли бензини бўйича шаклланган биржа котировкаси аввалги ҳафтага нисбатан 0,4 фоизга пасайган ва бир тоннаси учун 6 236 800 сўмни ташкил этган.
Эслатиб ўтамиз, Ўзбекистон Республикаси Вазирлар Маҳкамасининг 2019 йил 30 июндаги «Ёқилғи-энергетика ресурсларининг нархлари ва тарифларини ўзгартириш тўғрисида»ги 633-сонли қарорига мувофиқ 2019 йил 15 августдан бошлаб AI-91 русумли автомобиль бензинининг чакана нархи биржа савдолари орқали белгиланмоқда.
Ўтган ҳафтада суюлтирилган газ ишлаб чиқарувчилари биржа савдолари орқали 11,8 миллиард сўмлик 4544,0 тонна суюлтирилган газ сотган. Газнинг биржада шаклланган нархи олдинги ҳафтага нисбатан 4,6 фоизга пасайиб, бир тонна учун 2 596 900 сўмни ташкил этган.
Қора металл бозорида эса талаб ўсиб бормоқда. Хусусан, ST 12-35 GS арматуранинг нархи 19,5фоизга ўсиб, бир тоннаси учун 5 607 300 минг сўмни ташкил этган. Биржа орқали сотилган барча турдаги қора металлнинг ҳажми жами 7,7 минг тоннани ташкил қилган.
Олтиннинг нархи кичик пасайишни кўрсатмоқда, сўнгги савдо ҳафтасида шаклланган биржа котировкаси 1 грамм олтин учун 453,0 минг сўмни ташкил этган. Ҳафталик савдо натижаларига кўра, 271,9 миллион сўмлик 600 грамм Au-1 маркали олтин сотилган. Сотувчи сифатида «Олмалиқ КМК» АЖ савдода қатнашган.
Изоҳ (0)