Телба ва ўлмас гангстер лақаблари билан танилган Франциянинг Марсель шаҳрининг «қонундаги ўғриси» 89 ёшли Жак Эмбер вафот этди. Бу ҳақда «РИА Новости» хабар берди.
Гангстернинг рафиқаси Кристин Эмбер эрининг Экс-ан-Прованс коммунаси шифохонасида вафот этганини тасдиқлаган.
Жак Ле-Мат, яъни «Телба» лақабини олган Эмбер 1960—1970 йилларда Франциянинг криминал марказларидан бири бўлган Марсель шаҳридаги бандалардан бирига раҳбарлик қилган.
«Телба» лақаби Эмберга унинг қарздорлардан пул ундиришдаги услуби сабаб берилган. Учувчи лицензиясига эга Эмбер қарздорни самолётга ўткизиб, етарли баландликка чиққандан кейин двигателни ўчириб қўйган. Самолёт эркин тушиш тезлигида қулаётган вақтда ушбу таҳдиддан қўрққан қарздор барча пулларни тўлаб беришга рози бўлган.
1977 йилда Эмберга суиқасд уюштирилган ва у 20 та жойидан яраланиб, якунда омон қолганди. Ушбу воқеа асосида 2010 йилда бош ролни Жан Рено ижро этган «Ўлмас: 22 та ўқ» фильми суратга олинган.
Марсель жиноят олами афсонаси бўлган Эмбер умрининг сўнгги йилларида криминал ишлардан узоқлашган ва асосий эътиборини от пойгалари ҳамда шоу-бизнесга қаратганди. Унинг машҳур актёр Ален Делон билан биргаликда пойга отлари учун отхонага эгалик қилгани маълум.
Изоҳ (0)