Бангладеш шарқида иккита темирйўл поездининг тўқнашуви оқибатида 16 нафар одам ҳалок бўлди, деб хабар берди «РИА Новости».
Қурбонлар сони 16 нафарга етган, 50 нафардан ортиқ одам эса турли даражадаги тан жароҳатлари олган дейилади маҳаллий полиция баёнотида.
Ҳалокат 12 ноябрь, сешанба тонгида Брахманбария округининг Читтагонг вилоятида содир бўлган. Фожеани икки поезддан бирини бошқарган машинистнинг шаҳарлараро экспресс келаётганлиги ҳақидаги хабарга бепарволик билан муносабатда бўлгани келтириб чиқарган. Авариядан кейин Udayan Express рельсдан чиқиб кетган ва бир нечта вагон жиддий талофат кўрган.
Воқеа жойига тез тиббий ёрдам, полиция ва Бангладеш темирйўллар вазири етиб келган. Авария содир бўлган жойда махсус тергов гуруҳи сурштирув ишларини олиб бормоқда.
Қутқарув ишлари ҳам давом эттирилмоқда. Ҳукумат вакиллари ҳалок бўлганлар сонининг кўпайиши мумкинлигидан хавотирда.
Аввал Покистонда поездда юз берган портлаш оқибатида юзага келган ёнғинда 60 нафардан ортиқ одамнинг ҳалок бўлгани хабар қилинганди.
Изоҳ (0)