Туркия президенти Ражаб Тоййиб Эрдўғон АҚШ давлат раҳбари Дональд Трамп билан Вашингтон Сурия бўйича келишувда бажармаган мажбуриятларни муҳокама қилишини билдирди. Бу ҳақда «РИА Новости» хабар берди.
«Биз Суриядаги вазиятнинг барча томонларини муҳокама қиламиз. «Тинчлик булоғи» операциясининг охирги босқичи ҳақида гаплашамиз. Қочоқлар учун ‘хавфсиз зона’ тузиш бўйича келишув талабларининг нима учун бажарилмаётганига аниқлик киритамиз», — дейди Эрдўғон.
Туркия президенти америкалик ҳамкасби билан суҳбатдан кейин Россия давлат раҳбари Владимир Путин билан ҳам Суриядаги вазиятни муҳокама қилиб олади.
Туркия ва АҚШ етакчилари Вашингтонда 13 ноябрь куни учрашув ўтказишни келишиб олган. Томонлар телефон суҳбатида икки томонлама ҳамкорлик ва минтақавий муаммоларни муҳокама қилган.
10 ноябрда Кремл Путин ва Эрдўғоннинг телефонда суҳбатлашгани, Сурия шимоли-шарқидаги нотинч вазиятни муҳокама қилганини билдирган.
«Тинчлик булоғи» операцияси ҳақида
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган.
17 октябрда Анқара ва Вашингтон Сурия шимоли-шарқидаги операцияни 120 соатга, курдлар хавфсиз зона ҳудудидан чиқиб кетиши учун тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Туркия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патрул тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн-ал-Араб аҳоли пунктидаги (Кобани) иккинчи қўшма патрул тадбирларини бошлади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)