Tojikistonda terrorchi deb gumon qilingan qurolli shaxslar ovchi bo‘lib chiqdi

Tojikistonning Tursunzoda shahri aholisi 9-noyabr kuni Shirkent darasida qo‘lida qurol ushlagan shubhali odamlarni ko‘rib ularni terrorchi deb gumon qilgan va huquq-tartibot idoralariga bu haqda xabar bergan, deb yozmoqda “Regnum”.

Kelib tushgan ma’lumot asosida Dushanbe—Tursunzoda avtotrassasiga qurollangan harbiylar qo‘riqlaydigan blokpostlar joylashtirildi, shaharga zirxli texnika va vertolyotlar yuborildi. Vertolyotlar tog‘ hududini aylangach, darada qora kiyim kiygan shubhali shaxslar yurgani tasdiqlangan. O‘zbekiston chegarachilari ham chegara hududida qurolli odamlar yurgani haqida vaqtida ogohlantirilgan.

Biroq yakunda mahalliy aholining ma’lumoti o‘z tasdig‘ini topmadi. Shubhali qurollangan shaxslar mahalliy ovchilar bo‘lib chiqdi.

Barchasi oydinlashgach, blokpostlar olib tashlandi, askarlar va harbiy texnika o‘z manziliga qaytarilgan.

Maxsus operatsiya vaqtida “Do‘stiy” qo‘riqlash posti yopilmagan, ikki davlat o‘rtasida 17 ta chegara posti o‘z faoliyatini davom ettirmoqda.

5-noyabrdan 6-noyabrga o‘tar kechasi 20 nafar jangarilar Dushanbedan 60 kilometr uzoqlikdagi “Ishqobod” postining “Sultonobod” harbiy otryadiga hujum qilgan, to‘qnashuv natijasida noma’lum shaxslar chegarachilarning avtomatlarini egallab olgan, xavfsizlik xodimlari o‘tkazgan tezkor maxsus harbiy operatsiya davomida qurollangan jinoiy guruhning 15 nafar a’zosi yo‘q qilingan va 5 nafar jangari qo‘lga olingan. Jangarilar so‘roq qilinganidan keyin ularning Afg‘oniston hududidan qochib o‘tgan IShID terrorchilari ekanligi aniqlangan. Hujum uyushtirganlarning barchasi Tojikiston fuqarolari bo‘lgani, qo‘lga olingan va halok bo‘lganlar orasida ayollar ham borligi xabar qilindi. Afg‘oniston hukumati vakillari IShID terrorchilarining mamlakat hududidan Tojikistonga o‘tib, 6-noyabrda chegara postiga hujum uyushtirganini inkor etdi.

8-noyabr kuni Tojikiston bosh prokuraturasi chegara postiga uyushtirilgan hujum yuzasidan jinoyat ishi ochgan,  O‘zbekiston chegarachilari esa terrorchilik hujumidan so‘ng Tojikiston bilan chegaradosh hududlarni qo‘riqlashni kuchaytirgan. Keyinchalik IShID ushbu hujum uchun mas’uliyatni o‘z zimmasiga olgan.  Tojikiston tomondan halok bo‘lganlarning soni 2 emas balki 6 nafar ekani ma’lum bo‘ldi, biroq hukumat ushbu ma’lumotni rasman tasdiqlamagan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.