Ўзбекистонда сув истеъмолчиларидан ҳар куни ишлатган суви ҳақида маълумот бериш талаб этилиши мумкин

«Сув ресурслари ҳисобини юритиш ҳамда улардан фойдаланиш тартибини янада такомиллаштириш чора-тадбирлари тўғрисида» ҳукумат қарори лойиҳаси муҳокама учун жойлаштирилди.

Қарорга кўра, 2020 йил 1 июлидан бошлаб барча тоифадаги (коммунал сув таъминоти тизимидан ташқари) сув истеъмоли ва сувдан фойдаланиш тўғрисидаги ҳисоботлар электрон тарзда юритилади.

Сув истеъмолчилари ҳар куни соат 18:00 гача олган сувини нима мақсадда ишлатгани, қандай экинни қанча гектар суғоргани ҳамда сувни бошқа мақсадда ишлатгани тўғрисида сув истеъмолчилари уюшмасига маълумот беради.

Шунингдек, сув истеъмолчилари уюшмалари ҳар куни кечқурун соат 18:30 гача қайси манбадан қанча сув олгани, уни қайси сув истеъмолчиларига қанчадан тақсимлаб бергани ҳамда бу сув қайси мақсадлар учун, қандай фойдаланилганлиги, сувдан фойдаланиш коэффициенти ҳақида туман ирригация бўлимига ахборот бериб боради.

Ҳар 15 кунда туман ирригация бўлими билан олинган сув миқдори ва ундан қандай фойдаланилганлиги тўғрисида ўзаро далолатномалар тузади.

Ҳар чорак якуни бўйича 10 кун ичида туман ирригация бўлимига улар билан келишилган тарзда белгиланган шаклда ҳисобот беради.

Туман (шаҳар) ирригация бўлимлари ҳар куни кечқурун соат 19:00 гача ҳар бир сув манбасидан олган суви, иқтисодиёт тармоғига, сув истемолчилари уюшмасига қанчадан бергани ва улар сувни қандай мақсадда ишлатганлари, сувдан фойдаланиш коэффициенти ҳақида маълумотларни ирригация тизимлари ҳавза бошқармасига, нусхасини тегишли Ирригация тизими бошқармасига тақдим этади.

Ҳар 10 кунда тегишли магистрал канал (тизим) ва ирригация тизимлари ҳавза бошқармаси билан олган сувлари ва улардан қандай фойдаланганлиги тўғрисида ўзаро далолатномалар тузади.

Ҳар чорак якуни бўйича 10 иш куни давомида ирригация тизимлари ҳавза бошқармасига белгиланган тартиб ва шаклда ҳисобот беради.

Қорақалпоғистон Сув хўжалиги вазирлигига Ирригация тизимлари ҳавза бошқармаси Сув хўжалиги вазирлигига ҳар куни кечқурун соат 21:00 га қадар ҳар бир сув манбаидан олган жами суви, уни қайси магистрал каналга, ирригация тизими бошқармасига, вилоятга, туманга, иқтисодиёт тармоғига қанчадан бергани ва улар томонидан сув қандай мақсадлар учун ишлатилгани тўғрисида, қанча сув қайси сув ҳавзасига ташлангани, сувдан фойдаланиш коэффициенти ҳақида ёзма равишда кунлик ахборот бериб боради.

Ҳар чорак якуни бўйича 10 иш кун давомида Сув хўжалиги вазирлигига белгиланган тартиб ва шаклда ҳисобот тақдим қилади.

Қарор лойиҳаси муҳокамаси 26 ноябргача давом этади.