30 октябрь, чоршанба куни Туркманистон пойтахти Ашхободдаги меҳрибонлик уйи (Döwletliler köşgi) тарбияланувчиларига велосипедлар совға қилинди. «Хроника Туркменистана» нашрининг ёзишича, аслида ушбу велосипедлар мамлакат президенти Гурбангули Бердимуҳамедовга спорт ривожига қўшган ҳиссаси учун совға сифатида берилган.
Президентнинг ушбу туҳфасига меҳрибонлик уйи тарбияланувчилари махсус бағишлов қўшиқ ва рақс билан миннатдорчилик билдирди.
Президент совғалари топширилгач меҳрибонлик уйи тарбияланувчилари ҳукумат аъзолари, талабалар ва спортчилар билан биргаликда велосайрни амалга оширди. Саёҳат Арчабил ва Нейтрал Туркманистон кўчаларида ўтказилди ва манзилга етиб келганларидан кейин уларни концерт ва бадиий чиқишлар билан кутиб олишди. Томошаларда меҳрибонлик уйи тарбияланувчилари ҳам ўз санъат ва маҳоратларини намойиш қилди.
30 октябрь куни Гурбангули Бердимуҳамедов ўз ихтиёридаги яна иккита велосипедни Спорт ва ёшлар сиёсати вазирлиги биносидаги Давлат маданият маркази музейига совға қилди.
Туркманистон президенти музейдаги янги экспонатлар билан танишган. Бу ердаги тадбирда ҳам спорт усталари, спорт мактаблари ўқувчилари, маданият соҳаси вакиллари ва ОАВ ходимлари иштирок этган.
Маросимдан кейин тадбир ташкилотчилари махсус конференция ўтказиб, у ерда музей ходимлари номидан Гурбангули Бердимуҳамедовга миннатдорчилик билдирган.
Бердимуҳамедов музейга илк бор велосипед совға қилаётгани йўқ, 2017 йил сентябрда спортчилар унга тилладан ясалган велосипед ҳадя қилган ва ўшанда Туркманистон давлат раҳбари уни Президент музейига ҳадя қилган ва экспонат сифатида Спорт бўлимига жойлаштиришни тавсия қилганди.
Изоҳ (0)