29 октябрь куни Афғонистоннинг Da Afghanistan Breshna Sherkat (DABS) ижрочи директори Омонулло Ғолибдан «Ўзбекистон миллий электр тармоқлари» акциядорлик жамияти бошқарув раиси Дадажон Исақулов номига расмий мактуб келди, деб хабар беради ЎзА.
Унда ёзилишича, электр энергияси экспорти бўйича имзоланган электр энергиянинг шартномавий миқдори тушиб кетганига айни пайтда иккита омил таъсир кўрсатмоқда. Биринчиси, Боғлон вилояти ҳудудида жангарилар томонидан олиб борилаётган жанговар ҳаракатлар оқибати, иккинчиси Афғонистондаги иқлим шароити, хусусан, метеорологик ва гидрологик сабаблар (қор-лой кўчкиси, кучли шамол) ўтган йилги мавсумга нисбатан кескин тус олаётгани. Шунга қарамай, DABS ширкати муҳандислари таъмирлаш-тиклаш ишларини олиб бормоқда.
Бундан ташқари, 28 октябрь куни соат 11:53 дан 19:07 гача ва 29 октябрь куни соат 10:00 дан то ҳозирги пайтгача Афғонистон энергетиклари томонидан олиб борилаётган техник таъмирлаш ишлари хавфсиз бажарилишини таъминлаш мақсадида «Пули-Хумри» ва «Чимтала» подстанцияларини боғловчи 220 киловатлик ҳаво электр узатиш тармоғининг иккинчи занжири ўчирилгани маълум қилинган. Бу вақт оралиғида Афғонистонга экспорт амалга оширилмади ва бу ҳолат ҳанузгача давом этмоқда.
Ўзбекистондан Афғонистонга амалга оширилаётган электр энергияси экспорти масаласида барқарорлик мавжуд эмас.
Шу нуқтаи назардан «Ўзбекистон миллий электр тармоқлари» АЖнинг ахборот хизмати Афғонистон ҳукумати узлуксиз электр таъминотини тиклашда зарур чораларни кўриб, мавжуд муаммоларни бартараф этишига умид билдиради.
Изоҳ (0)