30-oktabr, chorshanba kuni Turkmaniston poytaxti Ashxoboddagi mehribonlik uyi (Döwletliler köşgi) tarbiyalanuvchilariga velosipedlar sovg‘a qilindi. “Xronika Turkmenistana” nashrining yozishicha, aslida ushbu velosipedlar mamlakat prezidenti Gurbanguli Berdimuhamedovga sport rivojiga qo‘shgan hissasi uchun sovg‘a sifatida berilgan.
Prezidentning ushbu tuhfasiga mehribonlik uyi tarbiyalanuvchilari maxsus bag‘ishlov qo‘shiq va raqs bilan minnatdorchilik bildirdi.
Prezident sovg‘alari topshirilgach mehribonlik uyi tarbiyalanuvchilari hukumat a’zolari, talabalar va sportchilar bilan birgalikda velosayrni amalga oshirdi. Sayohat Archabil va Neytral Turkmaniston ko‘chalarida o‘tkazildi va manzilga yetib kelganlaridan keyin ularni konsert va badiiy chiqishlar bilan kutib olishdi. Tomoshalarda mehribonlik uyi tarbiyalanuvchilari ham o‘z san’at va mahoratlarini namoyish qildi.
30-oktabr kuni Gurbanguli Berdimuhamedov o‘z ixtiyoridagi yana ikkita velosipedni Sport va yoshlar siyosati vazirligi binosidagi Davlat madaniyat markazi muzeyiga sovg‘a qildi.
Turkmaniston prezidenti muzeydagi yangi eksponatlar bilan tanishgan. Bu yerdagi tadbirda ham sport ustalari, sport maktablari o‘quvchilari, madaniyat sohasi vakillari va OAV xodimlari ishtirok etgan.
Marosimdan keyin tadbir tashkilotchilari maxsus konferensiya o‘tkazib, u yerda muzey xodimlari nomidan Gurbanguli Berdimuhamedovga minnatdorchilik bildirgan.
Berdimuhamedov muzeyga ilk bor velosiped sovg‘a qilayotgani yo‘q, 2017-yil sentabrda sportchilar unga tilladan yasalgan velosiped hadya qilgan va o‘shanda Turkmaniston davlat rahbari uni Prezident muzeyiga hadya qilgan va eksponat sifatida Sport bo‘limiga joylashtirishni tavsiya qilgandi.
Izoh (0)