Малайзиянинг «Умумжаҳон Сўфийлар ташкилоти» ташаббуси билан 31 октябрь—7 ноябрь кунлари Ўзбекистонда зиёрат туризми йўналишида Naqshbandi Tourism Festival 2019 номли халқаро тадбири ўтказилиши кутилмоқда. Бу ҳақда Туризмни ривожлантириш давлат қўмитаси матбуот хизмати хабар берди.
Мазкур тадбир Hilal Travel сайёҳлик ташкилоти ҳамда Туризмни ривожлантириш давлат қўмитаси кўмагида, шунингдек Дин ишлари бўйича қўмита, Ташқи ишлар вазирлиги, Uzbekistan Airways ва «Ўзбекистон темир йўллари» ҳамкорлигида ташкил қилинмоқда.
Naqshbandi Tourism Festival 2019 халқаро фестивали доирасида 18 давлат, жумладан, Малайзия, Индонезия, Туркия, Ҳиндистон, Хитой, Буюк Британия, Янги Зеландия, Австралия, Бразилия ва АҚШ давлатларидан 200 га яқин меҳмонларнинг ташриф буюриши кўзда тутилган.
Зиёрат дастури доирасида меҳмонлар Тошкент шаҳрида кутиб олиниб, сўнгра Бухоро шаҳри томон йўл олади. У ерда «Етти пир» номи билан машҳур бўлган зотларнинг зиёратгоҳларини зиёрат қилади.
Бундан ташқари, фестиваль дастурига кўра, меҳмонларнинг Мир Араб олий мадрасасига ташрифи ҳамда унинг фаолияти билан яқиндан танишиши режалаштирилган. Шундан сўнг халқаро тадбир меҳмонлари Самарқанд шаҳрига йўл олади. Темурийлар пойтахтида зиёратчилар ҳазрати Имом Бухорий мажмуаси, ҳазрат Хўжа Убайдуллоҳ Аҳрор ҳамда Шоҳи Зинда мажмуаларини зиёрат қилади. Меҳмонлар шунингдек Қарши ва Термиз шаҳарларига ҳам ташриф буюриши кўзда тутилган бўлиб, у ерларда Абул Муин Насафий, имом ат-Термизий, Ҳаким Термизий каби ислом оламининг машҳур алломаларининг муборак масканларини зиёрат қилади.
Ушбу зиёратлардан сўнг меҳмонлар Тошкентга йўл олиб, пойтахтда Ҳазрати Имом комплекси ва Ўзбекистон мусулмонлар идорасига ташриф буюради. Шу билан бирга, Ўзбекистонда илк бор мусхафи шариф чоп этилаётган «Ҳилол-нашр» матбаа-нашриёти фаолияти билан танишиш ҳамда Ўзбекистон Президенти ташаббуси билан бунёд этилган шайх Муҳаммад Содиқ Муҳаммад Юсуф номидаги масжид мажмуасига ташриф буюриш режалаштирилган.
Изоҳ (0)