Бош прокуратура ҳузуридаги Мажбурий ижро бюроси томонидан даъвогар ташкилотлар фойдасига 16 миллиард сўмдан ортиқ қарздорлик ундириб берилди. Бу ҳақда МИБ матбуот хизмати «Дарё»га хабар берди.
Аниқланишича, Тошкент вилояти Оҳангарон туманлараро иқтисодий судининг ижро варақасига асосан қарздор «Ангрен Логистика маркази» АЖ ҳисобидан ундирувчи давлат ва юридик ташкилотлар фойдасига жами 16 380 000 000 сўм ундириш тўғрисидаги ижро ҳужжати Мажбурий ижро бюросининг Ангрен шаҳар бўлимига келиб тушган.
Давлат ижрочиларининг ижро ҳаракатлари давомида, «Ангрен логистика маркази» АЖга тегишли бўлган 8,66 гектарда жойлашган умумий майдони 47906,3 квадрат метр бўлган кўчмас мулк (нотурар биноси) бошланғич баҳоси 40 миллиард 452 миллион сўмга баҳоланган.
Мазкур кўчмас мулк (нотурар биноси) кимошди савдосида «Электрон-онлайн аукционларнинг ташкил этиш маркази» ДУКнинг баённомасига асосан 20 миллиард 226 миллион сўмга «Intisoar Near» МЧЖга сотилган. Бунинг натижасида тадбиркорлик субъектлари фойдасига 1 миллиард 986 миллион сўм, давлат солиқ инспекцияси фойдасига 7 миллиард 700 миллион сўм солиқ қарздорлик, «Ўзавтосаноат» АЖ фойдасига эса 9 миллиард, ходимлар фойдасига 1 миллиард 141 миллион сўм иш ҳақи ва «Ўзавтосаноат» АЖ фойдасига 9 миллиард 399 миллион сўм қарздорлик тўлиқ ундирилганлиги маълум қилинади.
Изоҳ (0)