Андижон вилояти прокуратураси «Андижоннефть» акционерлик жамиятида нефть хом ашёсининг ўғирланиши ва талон-торож қилиниши бўйича жиноят иши қўзғатди. «Ўзнефтгазинспекция» мутахассислари компания фаолиятини текшириб, 12,8 миллиард сўмлик 153 минг тонна хом ашёнинг етишмаётгани, ўғирлангани ва талон-торож қилинганини аниқлади. Бу ҳақда «Gazeta.uz» хабар берди.
Хусусан, нефть конларида инвентаризация қилиш жараёнида хом ашёни йиғиш, тайёрлаш ва тарқатиш цехларида 254,5 миллион сўм миқдоридаги ортиқча 310,2 тонна, 22,7 миллион сўмлик етишмаётган 42 тонна, 479,6 миллион сўмлик ҳисобга олинмасдан қазиб олинган 795,8 тонна хом ашё аниқланган.
Шунингдек, сохта ҳужжатлар расмийлаштирилиши натижасида 2,5 миллиард сўмлик 3487 тонна хом ашёнинг етишмовчилиги, 70,8 миллион сўмлик 95,9 тонна яшириб қўйилган ортиқча маҳсулотлар мавжудлиги маълум бўлди. Ҳисоботларга 6,3 миллиард сўм қўшиб ёзилгани, дастлабки ҳужжатларни расмийлаштирмасдан 1,7 миллиард сўмлик 2947 тонна нефть ҳисобдан чиқариб ташлангани аниқланган.
«Ўзнефтгазинспекция» маълумотларига кўра, инвентаризация вақтида фақатгина июнь—сентябрь ойининг ўзида 1,8 миллиард сўмдан зиёд қийматли 1356 тонна ҳажмидаги ўғирлик, талон-торож, қўшиб ёзиш, етишмовчилик ҳолатлари аниқланган.
Текширув натижалари Андижон вилояти прокуратурасига тақдим этилган, тергов ҳаракатлари олиб борилмоқда.
Изоҳ (0)