Тошкент давлат стоматология институти талабаси халқаро олимпиаданинг мутлақ ғолибаси бўлди

Тошкент давлат стоматология институтида 21—22 октябрь кунлари «Стоматология Юга-2019» халқаро олимпиадаси ўтказилди. Унда 18 та етакчи тиббий олий таълим муассасалари, жумладан, Волгоград давлат тиббиёт университети, Кубан давлат тиббиёт университети, Москва давлат тиббиёт ва стоматология университети, Биринчи Москва давлат тиббиёт университети, Киров давлат тиббиёт университети, академик Павлов номидаги Рязань давлат тиббиёт университети, Пятигорск тиббиёт ва фармацевтика институти, Қозон давлат тиббиёт университети, Приволже тиббий тадқиқот университети, Бошқирдистон давлат тиббиёт университети, Қарағанда тиббиёт университети, Астана тиббиёт университети, Қозоғистон—Россия тиббиёт университети, Бурденко номидаги Воронеж давлат тиббиёт университети, Бухоро, Самарқанд ва Андижон тиббиёт институтлари ҳамда Тошкент давлат стоматология институтидан вакиллар қатнашган.

Ўзбекистон давлат академик рус драма театрида бўлиб ўтган тадбирни соғлиқни сақлаш вазири Алишер Шодмонов кириш сўзи билан очиб берди. Шунингдек, олий ва ўрта махсус таълим вазирининг ўринбосари Сарвархон Бузрукхонов, Тошкент давлат стоматология институти ректори Жасур Ризаев ва меҳмонлар халқаро танловнинг аҳамияти ҳақида нутқ сўзлади.

Олимпиадада тиббиёт олий таълим муассасаларининг юқори курсларида таҳсил олаётган 5 нафар талабадан иборат жамоалар иштирок этган. Олимпиада терапевтик стоматология, ортопедик стоматология, хирургик стоматология, болалар стоматологияси ва ортодонтия йўналишларида олиб борилган. Танловни халқаро тажрибага эга бўлган олимлар баҳолаб борган.

Танловда Ўзбекистонда номидан қатнашган Тошкент давлат стоматология институти талабалари иккита 1-ўрин, иккита 2-ўрин, битта 3-ўрин ва битта мутлақ ғолиб иштирокчи билан энг юқори ўринларни эгаллаган. Ушбу институт талабаси Диёра Исанова эса халқаро олимпиаданинг мутлақ ғолибаси бўлган. Умумжамоа ҳисобида Киров давлат тиббиёт университети ва Кубан давлат тиббиёт университети юқори ўринларни эгаллаган.

Олимпиада доирасида, шунингдек, тиббиёт муассасаларининг тақдимотлари ва конференциялари ҳам ўтказилган.