Сурхондарё вилояти ҳокимига янги ўринбосар, шунингдек, Шеробод туманига янги ҳоким тайинланди. Бу ҳақда вилоят ҳокимлиги матбуот хизмати хабар берди.
2019 йил 22 октябрь куни Халқ депутатлари Шеробод тумани Кенгашининг навбатдан ташқари сессияси ўтказилди. Сессияда ташкилий масала кўрилди.
Бобоқулов Ўрал Абрайқулович бошқа ишга ўтганлиги муносабати билан Шеробод тумани ҳокими вазифасидан озод қилинди. Шу кунгача вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимида ишлаб келган Амиров Алишер Хуррамович Шеробод тумани ҳокими этиб тасдиқланди.
Алишер Амиров 1977 йилнинг 19 августида Бойсун туманида туғилган. 2001 йилда Тошкент автомобиль йўллар институти, 2014 йилда Ўзбекистон Республикаси Президенти ҳузуридаги Давлат бошқаруви академиясини тамомлаган.
2016 йилда Сурхондарё вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари этиб тайинлангунга қадар, «Ўзавтойўл» давлат акциядорлик компанияси бошқаруви раисининг ўринбосари — бош муҳандиси лавозимида фаолият юритган.
Шунингдек, сессияда Юнусов Баҳодир Холёрович туман прокурори, Аминқулов Беҳзод Иброҳимович туман ички ишлар бўлими бошлиғи, Жумаев Шуҳрат Аллабердиевич туман давлат солиқ инспекцияси бошлиғи этиб тасдиқланди.
Шу куннинг ўзида Сурхондарё вилояти ҳокимлигида фаоллар йиғилиши ўтказилди. Унда вилоят ҳокими Тўра Боболов, Халқ депутатлари вилоят Кенгаши депутатлари, ҳокимлик аппарати масъул ходимлари, ҳуқуқни муҳофаза қилувчи идоралар, корхона ва ташкилотлар раҳбарлари иштирок этди.
Йиғилишда ташкилий масала кўрилди. Амиров Алишер Хуррамович Шеробод тумани ҳокими этиб тасдиқланиши муносабати билан шу кунгача Ўзбекистон Республикаси Иқтисодиёт ва саноат вазирлиги ҳузуридаги «Лойиҳалар ва импорт контрактларини комплекс экспертиза қилиш маркази»нинг Қурилиш бўйича харид ва лойиҳаолди ҳужжатларни экспертиза қилиш бошқармаси бошлиғи лавозимида ишлаб келган Сувонқулов Аҳмад Худойшукурович вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари этиб тайинланди.
Аҳмад Сувонқулов 1968 йилнинг 7 ноябрида Жарқўрғон туманида туғилган. 1994 йилда Тошкент давлат техника университети, 2009 йилда Тошкент молия институтини тамомлаган.
Узоқ йиллик фаолияти давомида Сурхондарё вилояти ҳокимлигида котибият мудири, вилоят ҳокимлиги «Ягона буюртмачи хизмати» инжиниринг компанияси директори, Шўрчи тумани ҳокимининг биринчи ўринбосари, Молия вазирлиги Инвестиция бошқармаси бошлиғи ўринбосари ва бошқа масъулиятли лавозимларда фаолият юритган.
Изоҳ (0)