Ўзбекистон Соғлиқни сақлаш вазирлиги томонидан маълум қилинишича, «Севимли» телеканалининг «Замон» ахборот дастурида берилган лавҳа асосида ижтимоий тармоқларда Қарши шаҳрида тез ёрдам чақирувга кечикиб келгани ва шифокорлар калтакланган ҳақида хабарлар тарқалган.
Маълум қилинишича, Соғлиқни сақлаш вазирлиги ва вилоят соғлиқни сақлаш бошқармаси мутахассислари бу ҳолатни ўрганиб, вазият юзасидан аввал ҳам маълумот берган эди. Тез ёрдамнинг кечиккани ҳақидаги фикр-мулоҳазалар бўйича яна бир марта вазият ўрганиб чиқилган.
Жорий йилнинг 16 октябрь куни соат 08:28 да республика шошилинч тез ёрдам илмий маркази Қарши филиали тез тиббий ёрдам станцияси чақирувлар марказига Қарши шаҳри Депо кўчаси 28-уйга чақирув бўлган. Қўнғироқ қилган киши 1967 йилда туғилган фуқаро Г.Ш. ҳушсиз эканлигини маълум қилган.
Чақирувга тез тиббий ёрдам бригадаси Hyundai автомашинасида соат 08:36 да юборилган. Бригада аъзолари берилган манзилга соат 08:42 да етиб келган.
Бригада машина станциядан юборилганидан хонадонга етиб боргунича ўтган вақт 6 дақиқани ташкил этган. Автомашина неча дақиқада етиб борганлигини исботлаш учун у юрган йўлдаги чорраҳаларда ўрнатилган видеокамералар тасвирларини кузатиш кифоя, дейилади вазирлик изоҳида.
Манзилда тез тиббий ёрдам ходимлари шахсиятга тегадиган ҳақоратли гаплар билан кутиб олинган ва улар биологик ўлим чақирувдан анча олдин қайд этилганини билдирганларидан сўнг аёвсиз калтакланган.
Тез тиббий ёрдам навбатчи шифокори ва фелдшер ўзлари борган автомашинада республика шошилинч тез ёрдам илмий марказининг Қарши филиалига олиб келинган, мутахассислар кўриги ва стандарт текширувлардан кейин нейрохирургия бўлимига даволаниш учун ётқизилган. Ички ишлар ходимларига хабар берилган.
Вазирлик томонидан таъкидланишича, соат 08:28 дан 08:42 гача мазкур манзилдан 103 телефони рақамига ҳар хил мобил рақамлардан уч марта қўпол ва таҳдидли муомала билан қилинган қўнғироқларни диспетчерлар қабул қилган ва манзилга аллақачон тез тиббий ёрдам бригадаси юборилганлигини билдирган.
Шу куни соат 09:01 да мазкур манзилга асоссиз равишда яна тез тиббий ёрдам бригадаси сўралган.
Бу вақтда диспетчерлар дастлабки чақирувга борган шифокор ва фелдшерга чақирув берилган фуқаронинг қариндошлари томонидан тажовуз қилинганлигини, чақирув берилган фуқаро вафот этганлигини билган ва ички ишлар ходимларига хабар берган.
09:01 даги мурожаат бўйича соат 09:02 да ўша хонадонга бошқа тез тиббий ёрдам бригадаси Hyundai автомашинасида йўналишдан жўнатилган. Бригада соат 09:08 да манзилга борган. Аммо шифокорга марҳумнинг яқинлари унинг шифохонага олиб кетилганлигини билдирган.
Республика шошилинч тез ёрдам илмий маркази Қарши филиалига марҳум Г.Ш. қариндошлари томонидан шахсий машинада шу куни тахминан соат 09:05 да олиб келинган ва тўғри реанимация бўлимига чиқарилган. Филиал реанимация бўлими шифокорлари томонидан тўлиқ текширув ўтказилган ва ўлим тахминан бир соат аввал содир бўлганлиги қариндошларига билдирилган, ички ишлар бўлимига хабар берилган.
Вазирликнинг қайд этишича, мазкур ҳолатда тез тиббий ёрдам ходимлари ўз бурчларини тўлиқ адо этган. Телеканал орқали берилган лавҳа асосида ижтимоий тармоқларда марҳумнинг яқинлари томонидан айтилган тез ёрдамнинг кечиккани ҳақидаги даъволар ҳеч қандай асосга эга эмас ва ўзларини оқлаш учун ўйлаб топилган важ, деб якунланади вазирлик муносабати.