Ўзбекистон товар хом ашё биржасида келтирилган маълумотларга кўра, 2019 йилнинг январь—сентябрь ойида тузилган битимларнинг умумий ҳажми 31 триллион 642 миллиард 200 миллион сўмни ташкил қилди. Бу ўтган йилнинг шу даврига тузилган битимларга нисбатан 41 фоиз кўпдир.
Кичик ва хусусий тадбиркорлар иштирокида тузилган битимларнинг умумий ҳажми 2018 йилнинг мос даври билан солиштирганда 36 фоизга ўсиб, 15 триллион 504 миллиард 700 миллион сўмни ташкил этди.
Биржа савдолари орқали 27 триллион 758 миллиард 500 миллион сўмлик товарлар сотилиб, ўсиш 35 фоизни ташкил эган. Сотувчи корхоналар савдолар давомида реал бозор нархларининг шаклланиши эвазига 1 триллион 586 миллиард 200 миллион сўмлик қўшимча даромад олган.
Кўриб чиқилаётган давр мобайнида электрон давлат харидлари бўйича 2 триллион 657 миллиард 500 миллион сўмлик битимлар тузилиб, маблағларнинг тежалиши — 542,9 миллиард сўмни ташкил қилди. Кўргазма ярмарка савдоларининг ҳажми 26 фоизга ўсиб, 1 триллион 112 миллиард 600 миллион сўмни ташкил этди.
Шунингдек, биржанинг онлайн аукционида 113,2 миллиард сўмлик 26 820 авторақамлар сотилган. Тузилган битта битимнинг ўртача қиймати 4,1 миллион сўмни ташкил этган.
Изоҳ (0)