«Ахборотлаштириш тўғрисида»ги қонунининг 12-1-моддасига мувофиқ, веб-сайт ёки веб-саҳифанинг эгаси, шу жумладан блогер ўз веб-ресурсларидан жиноий ва бошқа жавобгарликка сабаб бўладиган ҳаракатларни содир этиш мақсадида фойдаланилишига йўл қўймаслиги, шундай ҳолатлар содир бўлганда қонунга зид ахборотларни дарҳол ўчириб ташлаши шартлиги белгиланган.
Ахборот ва оммавий коммуникациялар агентлиги томонидан ахборот маконида шахс ва жамият манфаатларини ҳимоя қилиш, интернет ОАВ вакиллари ва блогерлар веб-саҳифаларига қонунга зид шарҳлар ёзилганда уларни аниқлаш ва зудлик билан ўчириб юборишни тизимли равишда ташкил қилиш бўйича тегишли норматив-ҳуқуқий ҳужжат лойиҳаси ишлаб чиқилди.
Энди веб-сайт ёки мессенжер саҳифалари эгаларига, шу жумладан блогерга, мавжуд конституциявий тузумни зўрлик билан ўзгартиришга даъват этиш, диний экстремизм, сепаратизм ва фундаментализм ғояларини тарғиб қилиш, миллий, ирқий, этник ёки диний адоват қўзғатувчи, фуқароларнинг шаъни ва қадр-қимматига ёки ишчанлик обрўсига путур етказувчи ва бошқа ҳуқуқий оқибатлар келтириб чиқарувчи шарҳлар жойлаштирилганда, уларни дарҳол ўчириб юбориш учун веб-сайт ёки мессенжер саҳифалари эгаларига, шу жумладан блогерга, Ахборот ва оммавий коммуникациялар агентлиги томонидан хабарнома юборилади.
«Таъкидлаш ўринлики, веб-сайт ёки мессенжер саҳифалари эгаси, блогер хабарнома олинган пайтдан бошлаб 24 соатдан кечиктирмасдан Ўзбекистон қонунчилигига зид бўлган ахборотни зудлик билан ўчириб ташлаши, шунингдек бу тўғрида Ахборот ва оммавий коммуникациялар агентлиги хабардор қилиши лозим бўлади», — дейди агентлик матбуот котиби Ҳикматулла Убайдуллаев.
Изоҳ (0)