Наманган вилояти ҳокимлиги ҳамда Саудия Арабистонининг Alqusaier компанияси ўртасида Namangan City лойиҳасини амалга ошириш бўйича англашув меморандуми имзоланди. Бу ҳақда «Дарё»га Наманган шаҳар ҳокимлиги ахборот хизмати маълум қилди.
Вилоят ҳокими Хайрулло Бозоров ҳамда Alqusaier бош директори Абдул Азиз ал-Кусайр томонидан имзоланган меморандумга кўра, Namangan City Наманган шаҳрида 78 гектар майдонда барпо этилади.
Ишбилармонлик марказидан бизнес-марказ, замонавий савдо мажмуалари, 3, 4 ва 5 юлдузли меҳмонхоналар, офислар, анжуманлар саройи, кўргазма заллари, турар жой ва виллалар, ресторанлар, мактаб, болалар боғчаси ва бошқа ижтимоий соҳа объектлари ўрин олади.
Лойиҳа тўлалигича Саудия Арабистони компанияси маблағлари ҳисобидан молиялаштирилади. Ўзбекистон томони Namangan City фаолияти учун зарур бўлган инфратузилмани (электр энергия, газ ва сув таъминоти, канализация) таъминлаш масалаларини ҳал этади.
Меморандум имзоланиши арафасида Абдул Азиз ал-Кусайр Наманган шаҳар ҳокимлигида қабул қилинган ва Namangan City лойиҳаси билан батафсил таништирилган эди.
Namangan City қурилиши тегишли ҳужжатлар имзолангандан сўнг 3—5 йил ичида амалга оширилиши кўзда тутилган.
Наманганда ҳам Сити қурилиши Президент Шавкат Мирзиёевнинг 2018 йил майида вилоятга қилган ташрифи чоғида маълум бўлган эди. Дастлабки маълумотларга кўра, у шаҳарнинг Гулистон даҳасида қад ростлайди.
Изоҳ (0)