Ижтимоий тармоқларда 18 октябрь куни Тошкентда оқ Lacetti ЙПХ ходимларининг талабига бўйсунмай, улардан қочаётгани акс этган видеоёзув тарқалган эди. Ҳодиса гувоҳлари қочоқ автомобиль рулида аёл киши бўлганини маълум қилган эди. Ушбу ҳолат юзасидан Тошкент шаҳар ИИББ матбуот хизмати ахборот берди.
Маълум бўлишича, Тошкент ҳалқа автомобиль йўли (ТҲАЙ)нинг Олмазор туманидаги «Айвон» чойхонаси олдидан ўтган қисмида 17 октябрь куни соат 22:35 да ЙҲХБ ЙПХ инспектори М.З. ҳуштак ва жезл билан Lacetti (давлат рақами 01 D 616 VV) ҳайдовчисига тўхташ ишорасини кўрсатган.
Ҳайдовчи эса ЙПХ инспекторининг талабига бўйсунмай, ҳаракатни катта тезликда давом эттирган. Шундан сўнг ЙПХ ходими С.Х. қоидабузар ҳайдовчининг автомобилини Lacetti русумли хизмат автомобилида (давлат рақами 01 673 VSC) таъқиб қила бошлаган.Қоидабузар ҳайдовчи ТҲАЙ бўйлаб ҳаракатни давом эттириб, «Уч қаҳрамон» постигача борган, сўнг Амир Темур ва Янгишаҳар кўчалари кесишмасидаги айлана чорраҳада маълум вақт қарама-қарши йўналишда ҳаракатланган.
«ЙҲХБ ходимлари томонидан кўрилган чоралар натижасида соат 22:55 да автомобиль Юнусободнинг Каймакова кўчасида (собиқ 17-сон шифохона қаршисида) тўхтатилган ва З.А.га тегишли бўлган автомобиль Тошкент вилоятида яшовчи 25 ёшли Гулираъно А. бошқариб боргани аниқланган», — дейилади ИИББ ахборотида. Автомобильни бошқариш учун зарур бўлган ҳужжатлар тўпламидан Гулираънода фақат ишончнома бўлган.
Унга нисбатан Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) ва 194-моддаси (ички ишлар органлари ходимининг қонуний талабларини бажармаслик) бўйича маъмурий баённомалар расмийлаштирилиб, унинг автомобили жарима майдончасига жойланган.
Изоҳ (0)