Петропавловск-Камчатский шаҳар суди ўзбекистонлик 21 яшар Холматбой Ҳасан ўғлини маъмурий ҳуқуқбузарликда — хорижлик фуқаронинг Россияда бўлиб туриш тартибини бузганликда айбдор деб топди. У энди 3 минг рубль жарима тўлайди ва мажбурий тарзда Россиядан бадарға қилинади.
«Кам 24» ахборот агентлигига кўра, Холматбойнинг турмуш ўртоғи, 27 ёшли Екатерина 9 сентябрь куни Крашенинников бухтасида ўзининг икки боласини чўктирган. Аёлга қасддан қотиллик бўйича айблов эълон қилинди. Тергов тахминича, Екатеринани жиноятга рашк ундаган. Холматбой устидан маъмурий иш кўрилаётганда бу тахмин қисман тасдиғини топди. Судланувчи бошқа аёл билан учрашаётганини яширмаган.
Холматбойнинг айтишича, у Екатерина билан ўтган йили танишган, жорий йил 23 февралда эса никоҳдан ўтган. Июнь ёки июль ойида (ўзи ҳам аниқ эслолмайди) хотинининг кўзи ёрийди ва туғруқхонадан уларни ўзи олиб тушади. Бироқ орадан кўп ўтмай Анна исмли қиз билан танишиб қолади ва у билан шаръий никоҳдан ўтади.
Анна ҳам суд жараёнида иштирок этди. Қиз Холматбой билан ижтимоий тармоқда танишгани (Холматбой Екатерина билан ҳам ижтимоий тармоқ орқали танишган) ва орадан бир неча кун ўтиб биргаликда яшай бошлаганини билдирди. Унинг айтишича, Холматбой Россия фуқароси бўлган аёлга (гап Екатерина ҳақида кетмоқда) мамлакатда бўлиб туришини қонунийлаштириш учун уйлангани, бироқ хотини дунёга келтирган боланинг отаси эмаслиги ҳақида гапириб берган. Ҳозирда Анна Холматбой билан Ўзбекистонга кетиш учун хорижий паспортни расмийлаштирмоқда.
Екатерина биринчи турмушидан бўлган 5 яшар ўғли ва икки ойлик қизи билан Вилючинск шаҳрида, бу ёпиқ шаҳарга киришга рухсати бўлмаган Холматбой эса Петропавловскда яшаб келган. Аёл ўрмон хўжалигида муҳандис бўлиб ишлаган, ўғли болалар боғчасига борган.
9 сентябрь куни тонгда у болалари билан Крашенинников бухтасига келади. Ўғлини ўзига арқон билан боғлаб, қиз чақалоғини қўлига кўтариб, ўзини сувга отади. Болаларнинг қичқириғини ўша атрофдаги эркак эшитиб қолади ва полиция чақиради. Гувоҳларнинг айтишича, полициячилар дарров қайиқ олиб, ёрдамга шошилган. Аммо Екатерина «Биз ҳеч кимга керак эмасмиз!» дея уларни ўзидан йироқлаштиришга уринган. Қаршиликка қарамай, полициячилар аёл ва болаларни сувдан олиб чиқишга муваффақ бўлди. Бироқ болаларнинг кичиги ўша чоғда, каттаси касалхонанинг жонлантириш бўлимида ҳаётдан кўз юмади.
Ижтимоий ҳимоя идораларининг билдиришича, Екатеринанинг оиласида моддий етишмовчиликлар кузатилмаган, унинг онаси ва ўгай отаси, кўплаб қариндош-уруғлари бор. Ўзи Вилючинскда икки хонали квартирада яшагани, яқинда банкдан кредит олгани айтилмоқда.
Холматбой Ҳасан ўғли ҳозирда Россияда бўлиб турибди. Уни Россиядан бадарға қилиш ҳақидаги қарор яқин ҳафталарда амалга оширилади.
Изоҳ (0)