Ижтимоий тармоқларда Bukhara City қурилиши боис дўкони бузилган мармарсозлар 2 миллион АҚШ доллари зарар кўргани ҳақида хабарлар тарқалди. Вазият Фуқаролик ишлари бўйича Бухоро вилояти суди, вилоят Давлат активларини бошқариш бошқармаси, Бухоро шаҳар ҳокимлиги, шаҳар ер тузиш ва кўчмас мулк кадастри хизмати, Bukhara City дирекцияси масъуллари томонидан аҳвол атрофлича ўрганиб чиқилди, деб хабар беради вилояти ҳокимлиги матбуот хизмати.
Маълум бўлишича, ҳудудда мулкий келишмовчилик билан боғлиқ низо бир неча йил олдинроқ пайдо бўлган.
Вазирлар Маҳкамасининг Bukhara City ишбилармонлик ва турар жойлар марказини барпо қилишга доир ташкилий чора-тадбирлар тўғрисидаги қарори 2019 йил 8 июлда қабул қилинган бўлиб, юқорида қайд этилган мулкларни давлат эгалигига қайтариш бўйича қарор, яъни Фуқаролик ишлари бўйича Бухоро туманлараро судининг 2018 йил 23 апрелдаги ҳал қилув қарори бундан бир йил-у икки ой аввал қонунан кучга кирган.
Низоли ҳудудда бирорта аҳоли турар жой объекти мавжуд эмас.
Тарқалган хабарларда айтилган манзил, «Бухоро люкс мармар», «Руҳхур» ва яна 6 та ширкатга бирлашган мармарсозлар фаолият кўрсатиб келган ҳудуд аслида Давлат мулкини бошқариш ва хусусийлаштириш қўмитасининг 1994 йил 30 июндаги 447к-ПО-сонли буйруғига асосан «163-сонли қурилиш трести»га, кейинчалик эса айнан ўша йилдан эътиборан «Бухороқурилиш» очиқ акциядорлик жамиятига айлантирилган ҳудуддир. Жамиятнинг низом жамғармаси 882 миллион сўм этиб белгиланган.
Мазкур буйруқнинг 4-бандида жамиятга 208 миллион 200 минг сўмлик давлатга тегишли ижтимоий инфраструктура объектлари сотмаслик ва фаолият турини ўзгартирмаслик шарти билан берилган бўлса-да, жамият томонидан мазкур бино-иншоотлар бир қатор жисмоний ва юридик шахсларга сотилган ҳамда бегоналаштирилган.
Бухоро шаҳар Ер тузиш ва кўчмас мулк кадастр хизмати томонидан умумий ер майдони 73 минг квадрат метрдан ортиқ, шундан қурилиш ости майдони қарийб 14 минг квадрат метрдан иборат ишлаб чиқариш бино-иншоотлари ва унга ёндош ер майдони «Бухороқурилиш» ОАЖ номига давлат рўйхатидан ўтказилган. Аммо орадан 24 йил ўтиб, айнан фаолиятсизлиги сабабли, аниқроғи, фуқаролик ишлари бўйича Бухоро туманлараро судининг 2018 йил 23 апрелдаги ҳал қилув қарори билан мазкур объектнинг хусусийлаштириш ҳужжатлари, битимларни ва кадастр ҳужжатларини ҳақиқий эмас деб топиш ва мулкни давлат эгалигига қайтариш тўғрисидаги даъво қисман қаноатлантирилган.
Давлат мулкини бошқариш ва хусусийлаштириш қўмитасининг 1994 йил 23 сентябрдаги «Бухороқурилиш» очиқ акциядорлик жамияти номига берилган 642-сонли мулкий ҳуқуқни тасдиқловчи давлат ордери ҳамда кадастр ҳужжатлари ҳақиқий эмас деб топилган.
Тадбиркорлик субъектлари билан бўлган барча низолар вилоят ҳамда республика миқёсидаги суд инстанцияларида кўриб чиқилган. Жумладан, фуқаролик ишлари бўйича Бухоро вилояти суди кассация инстанциясининг ажрими билан биринчи инстанция судининг ҳал қилув қарори ўзгаришсиз қолдирилган.
Хабарда таъкидланганидек, «Бухоро люкс мармар» МЧЖнинг «...ҳозир менга товон пули тўламаслик учун бино 25 йил олдин нотўғри расмийлаштирилган деган баҳонани ўйлаб топишди» деган важи ҳақиқатдан йироқ, уйдирма бўлиб, бу масала фуқаролик ишлари бўйича Бухоро туманлараро судининг 2018 йил 23 апрелдаги ҳал қилув қарори билан қонуний ечимини топган.
«Bukhara City бўладими ёки Бухоро вилоятининг бошқа ҳудудидаги қурилиш майдони бўладими қонуний мулк эгаларига етказилган зарарлар тўлиқ тўлаб берилиши ваколатли органлар томонидан доимий назоратга олинган», — дейилади хабарда.
Изоҳ (0)