Ijtimoiy tarmoqlarda Bukhara City qurilishi bois do‘koni buzilgan marmarsozlar 2 million AQSh dollari zarar ko‘rgani haqida xabarlar tarqaldi. Vaziyat Fuqarolik ishlari bo‘yicha Buxoro viloyati sudi, viloyat Davlat aktivlarini boshqarish boshqarmasi, Buxoro shahar hokimligi, shahar yer tuzish va ko‘chmas mulk kadastri xizmati, Bukhara City direksiyasi mas’ullari tomonidan ahvol atroflicha o‘rganib chiqildi, deb xabar beradi viloyati hokimligi matbuot xizmati.
Ma’lum bo‘lishicha, hududda mulkiy kelishmovchilik bilan bog‘liq nizo bir necha yil oldinroq paydo bo‘lgan.
Vazirlar Mahkamasining Bukhara City ishbilarmonlik va turar joylar markazini barpo qilishga doir tashkiliy chora-tadbirlar to‘g‘risidagi qarori 2019-yil 8-iyulda qabul qilingan bo‘lib, yuqorida qayd etilgan mulklarni davlat egaligiga qaytarish bo‘yicha qaror, ya’ni Fuqarolik ishlari bo‘yicha Buxoro tumanlararo sudining 2018-yil 23-apreldagi hal qiluv qarori bundan bir yil-u ikki oy avval qonunan kuchga kirgan.
Nizoli hududda birorta aholi turar joy obyekti mavjud emas.
Tarqalgan xabarlarda aytilgan manzil, “Buxoro lyuks marmar”, “Ruhxur” va yana 6 ta shirkatga birlashgan marmarsozlar faoliyat ko‘rsatib kelgan hudud aslida Davlat mulkini boshqarish va xususiylashtirish qo‘mitasining 1994-yil 30-iyundagi 447k-PO-sonli buyrug‘iga asosan “163-sonli qurilish tresti”ga, keyinchalik esa aynan o‘sha yildan e’tiboran “Buxoroqurilish” ochiq aksiyadorlik jamiyatiga aylantirilgan hududdir. Jamiyatning nizom jamg‘armasi 882 million so‘m etib belgilangan.
Mazkur buyruqning 4-bandida jamiyatga 208 million 200 ming so‘mlik davlatga tegishli ijtimoiy infrastruktura obyektlari sotmaslik va faoliyat turini o‘zgartirmaslik sharti bilan berilgan bo‘lsa-da, jamiyat tomonidan mazkur bino-inshootlar bir qator jismoniy va yuridik shaxslarga sotilgan hamda begonalashtirilgan.
Buxoro shahar Yer tuzish va ko‘chmas mulk kadastr xizmati tomonidan umumiy yer maydoni 73 ming kvadrat metrdan ortiq, shundan qurilish osti maydoni qariyb 14 ming kvadrat metrdan iborat ishlab chiqarish bino-inshootlari va unga yondosh yer maydoni “Buxoroqurilish” OAJ nomiga davlat ro‘yxatidan o‘tkazilgan. Ammo oradan 24 yil o‘tib, aynan faoliyatsizligi sababli, aniqrog‘i, fuqarolik ishlari bo‘yicha Buxoro tumanlararo sudining 2018-yil 23-apreldagi hal qiluv qarori bilan mazkur obyektning xususiylashtirish hujjatlari, bitimlarni va kadastr hujjatlarini haqiqiy emas deb topish va mulkni davlat egaligiga qaytarish to‘g‘risidagi da’vo qisman qanoatlantirilgan.
Davlat mulkini boshqarish va xususiylashtirish qo‘mitasining 1994-yil 23-sentabrdagi “Buxoroqurilish” ochiq aksiyadorlik jamiyati nomiga berilgan 642-sonli mulkiy huquqni tasdiqlovchi davlat orderi hamda kadastr hujjatlari haqiqiy emas deb topilgan.
Tadbirkorlik subyektlari bilan bo‘lgan barcha nizolar viloyat hamda respublika miqyosidagi sud instansiyalarida ko‘rib chiqilgan. Jumladan, fuqarolik ishlari bo‘yicha Buxoro viloyati sudi kassatsiya instansiyasining ajrimi bilan birinchi instansiya sudining hal qiluv qarori o‘zgarishsiz qoldirilgan.
Xabarda ta’kidlanganidek, “Buxoro lyuks marmar” MChJning “...hozir menga tovon puli to‘lamaslik uchun bino 25 yil oldin noto‘g‘ri rasmiylashtirilgan degan bahonani o‘ylab topishdi” degan vaji haqiqatdan yiroq, uydirma bo‘lib, bu masala fuqarolik ishlari bo‘yicha Buxoro tumanlararo sudining 2018-yil 23-apreldagi hal qiluv qarori bilan qonuniy yechimini topgan.
“Bukhara City bo‘ladimi yoki Buxoro viloyatining boshqa hududidagi qurilish maydoni bo‘ladimi qonuniy mulk egalariga yetkazilgan zararlar to‘liq to‘lab berilishi vakolatli organlar tomonidan doimiy nazoratga olingan”, — deyiladi xabarda.
Izoh (0)