Когон шаҳридаги «Адолат» маҳалласида жойлашган Дўстлик кўчаси ҳудудида 10100 квадрат метр боғ бўлиб, бундан 30 йилча илгари бўш ер бўлган мазкур майдонда аҳоли томонидан ҳашар йўли билан 1000 дан ортиқ манзарали ва мевалари дарахтлар ўтқазилган. Бу ҳақда «Дарё» мухбири Лайло Ҳайитова хабар бермоқда.
Бундан ташқари, аҳоли Когон шаҳар ҳокимлиги захира ери ҳисобланган ушбу майдонларнинг маълум қисмига томорқа экинлари экиб, вақтинча фойдаланиб келган. Бироқ кейинги 5-6 йил давомида боғ ва ундаги дов-дарахтлар яшнаб туришининг эътибордан четда қолгани, уларнинг номаълум шахслар томонидан ўзбошимчалик билан кесиб кетилгани, қўй-қўзилар боқилгани ва етмагандек, боғнинг хуфиёна кўнгилочар учрашувлар хиёбонига айланиб, салбий таассуротлар уйғота бошлагани кенг жамоатчиликни сергаклантирган.
— Бу боғ ҳақиқатан ҳам Когон шаҳар ҳокимлиги захира ер майдони ҳисобланади. Аммо чорак аср илгари шу ерда яшовчи аҳолининг меҳнати билан боғ барпо қилинган. Дарахтлар ўтқазилган. Меваларидан фойдаланиб, бўш ер майдончаларида томорқа экинлари экиб келишган. Бироқ бу ер кейинчалик хуфиёна учрашувлар масканига айланиб қолганди. Бу кўпчилик ота-оналарни ҳам ташвишлантиргани рост, — дейди «Адолат» маҳалласи фуқаролари.
Бундан ташқари, аҳоли ва фуқароларнинг тегишли идора-ташкилотларга мурожаати ва шу юзасидан ҳуқуқ-тартибот идоралари томонидан огоҳлантирилишига қарамай, ҳудуддаги айрим қўни-қўшнилар боғдан ўзбошимчалик билан фойдаланишдан ташқари, қўй-қўзиларни боқишда давом этаверган.
— Биз узоқ йиллар давомида қўни-қўшнилар билан бўш ер майдонида каттагина боғ барпо этганмиз. Мевали ва манзаралари дарахтлар жуда кўп эди. У-бу баҳоналар билан ўзимизга таниш бўлмаган одамлар дарахтларни кесиб кетаверишди. Кўп ўтмай, ҳудудда бузиш-қуриш ишлари бошланди. Боғ атрофи темир панжара билан ўраб олинди. Етмагандек, боғ ёнидаги кўп қаватли уйлар ҳамда ҳовли-жойларда яшайдиган аҳоли фарзандлари фойдаланиб келаётган болалар ўйингоҳи ҳам бузиб ташланди, — дейди «Адолат» МФЙ фуқароси Амина Кенжаева. — Болаларимиз уйдан кўчага чиқолмай қолган. Бир томон катта автомобиль қатнов йўли, иккинчи томон кўп қаватли уй ва ҳовли-жойлар, олд томондаги боғ темир тўсиқлар билан ўраб олинган.
Когон шаҳар ҳокимига кўра, «Адолат» МФЙ Дўстлик кўчасидаги жами ҳудуди 10100 квадрат метрли ер майдонида «Ёшлар хиёбони» ташкил этиш кўзда тутилган. Унинг 2019 йил 12 апрелдаги 616-сонли қарорига асосан, «Шодлик-қурилиш аква сервис» МЧЖга ушбу ер майдонининг 1200 квадрат метри савдо мажмуаси, сартарошхона, поябзал тузатиш устахонаси ҳамда тикувчилик цехи қуриш учун ажратилган. Айни пайтда боғни замонавий кўринишга келтириш ҳамда аттраксион жиҳозлар билан таъминлаш чоралари кўрилмоқда.
Фуқаро Зулайҳо Шаропованинг шикоятича эса, тадбиркор ўзи ва боғ қоровули улар эккан дарахтлар мевасидан фойдаланиб, экинларни пайҳон қилиб келмоқда. Эртадан кечгача боғда қўй боқишмоқда. Фуқароларнинг бу шикояти ўринли эди. Ҳақиқатан ҳам «Дарё» суриштируви чоғида боғда қўйлар ўтлаб юрган ва дарахтлар пайҳон қилинаётган эди.
Аҳоли томонидан тадбиркорга ҳар бир ҳовли тўғрисидан темир тўсиқлар билан ўраб олинаётган боққа кирадиган эшик очиши шарти қўйилган. Бироқ, тадбиркор аҳолининг бу талабини рад этган.
— Мен қўчқорни айни пайтда савдо мажмуаси, сартарошхона, поябзал тузатиш устахонаси ҳамда тикувчилик цехининг қуриб битказилиши муносабати билан шу ернинг аҳолисига хайрия оши учун боқаётганимни тан оламан. Аҳолининг ҳар бири ҳовлиси тўғрисидан боққа кирадиган эшик очиб қўйиш талабини эса қондира олмайман. Боғни замонавий кўринишга келтириш учун жуда қиммат маблағ ҳисобига аттраксионлар келтирилади. Уларнинг катта кучланишдаги электр токи эвазига ҳаракатга келиши ҳаммага маълум. Болалар ва аҳолининг хавфсизлиги учун ҳам жавобгарман ахир. Ташландиқ ва жуда кўримсиз аҳволдаги боғ учун айни пайтгача 1 миллиарддан ортиқ харажат қилдим. 50 миллион сўм эвазига бор-йўғи 100 метр темир тўсиқ ўрнатдик, — дейди «Шодлик-қурилиш аква сервис» МЧЖ раҳбари, ёш тадбиркор Қаҳрамон Сафаров. — «Ёшлар хиёбони» Когон шаҳрида мавжуд марказий боғдан ҳам кўркам ва замонавий кўринишга эга бўлади. Ҳозир тадбиркорлик фаолиятимга қайсидир маънода тўсиқ бўлаётган аҳоли ҳали хурсанд бўлади. Бунга ишонаман. Ҳозирча ишлар чала эканлигини яширмайман.
Маълумотга кўра, ҳудудда «Обод маҳалла» дастури амалга оширилмоқда. Янгидан барпо этилаётган «Ёшлар хиёбони»да аттраксион жиҳозларидан ташқари, 350 га яқин соябонли ўриндиқлар, мусиқали фаввора, тадбирлар ўтказиладиган саҳна ва бошқа имкониятлар яратилади. Хиёбонга кириб-чиқиш эса фақат битта дарвоза орқали амалга оширилади.
— Жуда кўплаб дарахтларни кесиб ташлаб, ўрнида 9 та хизмат уйи тиклашди. Бундан ташқари, уйимиз олдидаги болалар ўйингоҳини бузиб ташлаб, ачинарли аҳволга келтириб қўйишди. Аввалига болалар спорт майдончаларини қайта тиклаймиз, дейишганди. Энди эса бундай майдончалар барпо этилмаслигини билдиришди. Тўғри, яшил футбол майдонини ҳам барпо этишди. Аммо у пуллик. Бу эса ҳамманинг ҳам чўнтагига тўғри келавермайди, — дейди фуқаро Галина Кан.
Шу куни Когон шаҳар ҳокими «Адолат» аҳолиси билан учрашди. Унга кўра, бирорта дарахт сабабсиз кесилмаган. Жуда кўп йиллик мевали ва манзарали дарахтларнинг поядан чирий бошлагани ва қуриётгани учун кесиб ташланган.
— Яна шундай дарахтлар йўқ эмас. Уни ўз кўзингиз билан кўришингиз мумкин, — деди «Дарё» мухбири билан суҳбатда Когон шаҳар ҳокими Ҳаким Ҳошимов бир нечта қуриган, илдиз ва поясидан чирий бошлаган дов-дарахтларни кўрсатар экан, — аммо қолган барча соғлом дарахтларни сақлаб қолиш чоралари кўриляпти. Ваҳоланки, замонавий боғнинг кўркам бўлишида манзарали дарахтларнинг ўрни беқиёс. Бундан ташқари, тупроқ-иқлим шароитига мос дарахт ва буталар янада кўпайтирилади. Хусусан, япроқ ва нинабаргли дарахтлар сони оширилади. Бу хиёбоннинг кўкаламзорлаштириш композициясини яратишда аҳамият касб этади. Фақат аҳоли бироз сабр билан кутиши керак. «Обод маҳалла» дастуридаги бунёдкорлик ишлари 2020 йил март ойларида тўлиқ якунланади.
Юзма-юз учрашувда тўловли спорт майдонларидан ташқари, аҳолининг талаб ва истаги билан кўп қаватли уйлар ва ҳовли-жойлар аҳолиси фарзандлари учун қўшимча спорт ўйингоҳлари бунёд этиладиган бўлди.
Изоҳ (0)