Тошкент шаҳрида 2 ёшли бола 4-қават деразасидан тушиб кетиб ҳалок бўлди

Тошкент шаҳрида 2 ёшли бола бахтсиз ҳодиса натижасида ҳалок бўлди. Бу ҳақда Тошкент шаҳар Ички ишлар бош бошқармаси матбуот хизмати хабар берди.

13 октябрь куни соат 11:13 да 102 рақамига хабар келиб тушган. Унга кўра, Чилонзор туманида 2 ёшли М.М. ётоқхонада қаровсиз қолдирилганида, бола каравотга чиқиб, дераза токчасига ўтиб олган. Дераза эса очиқ бўлган ва бола 4-қаватдаги хонадон деразасидан йиқилиб тушган. Натижада бола олган тан жароҳатлари сабабли ҳаётдан кўз юмган.

«Ҳурматли ота-оналар, сизлардан ёш болаларни деразаси очиқ қолган хоналарда ёлғиз қолдирмасликни сўраймиз. Шунингдек, болалар чиқиб олиши осон бўлган мебел, стул ва бошқа буюмларни деразага зичлаб жойлаштирманг. Москит тўрларининг мустаҳкамлигига ишониб қолманг – уларнинг аксарияти боланинг оғирлигига бардош берадиган даражада мустаҳкам эмас. Кўплар хонадон балконида баландлиги дераза токчасигача етадиган тахталар ўрнатишади. Бу ҳам бахтсиз ҳодисага сабаб бўлиши мумкин. Бу каби ҳолатлар юз бермаслиги учун сизларга деразалар ортига панжаралар қўйишни ҳамда ойналарга мустаҳкам болалар чеклагичларини ўрнатишни тавсия этамиз», — деб огоҳликка чақирган ИИББ.