Комил Алламжонов БАА ҳукумат ва келажак ишлари вазири билан интернет ва ижтимоий тармоқлардаги хавфсизлик масаласини муҳокама қилди

Ахборот ва оммавий коммуникациялар агентлиги делегацияси Бирлашган Араб Амирликлари ҳукумат ва келажак ишлари вазири Муҳаммед ал-Гергави билан учрашди. Бу ҳақда агентлик раҳбари Комил Алламжонов ўзининг Telegram каналида маълум қилди.

БАА вазири билан учрашувимиз Интернет ва ижтимоий тармоқлардаги хавфсизлик масаласи бутун дунёнинг умумий муаммосига айланганини яна бир бор тасдиқлади. Ёлғон хабарлар, ижтимоий тармоқлардаги ‘фейк’ аккаунтлар, троллар барча мамлакатлар учун чинакам хатарга айланган ва унга қарши кескин курашлар кечмоқда.

Биз бу борада ривожланган араб мамлакатининг ахборот соҳасидаги тажрибаси, улар қўллаётган услублар билан танишдик. Мамлакат имижини шакллантириш ва PR соҳасига оид халқаро илғор тажрибалар билан ўртоқлашдик.

Ўйлайманки, бу агентлигимиз жамоаси учун ҳар томонлама самарали бўлади.

Комил Алламжонов, Ахборот ва оммавий коммуникациялар агентлиги раҳбари