Риштон шаҳрида блогер Дима Қаюм бир гуруҳ аёллар томонидан ҳужумга учради. Ҳужум акс этган видеолавҳа «Қўшни маҳалла» Telegram канали томонидан эълон қилинди.
Видеода бир гуруҳ аёлларнинг блогерга ташланиб, унга нисбатан жисмоний куч ишлатаётганини кўриш мумкин.
Халқ депутатлари Учтепа туман кенгаши депутати Нуриддин Зайнитдинов ушбу ҳолатга муносабат билдирди.
Блогер ва самимий инсон Дима Қаюмга нисбатан кеча Риштонда уюштирилган ‘самосуд’ ҳолати, унинг олиб бораётган хайрли ишлари ва блогерлик фаолияти ғашига теккан, кутубхона қурилишига қарши бир гуруҳ шахслар томонидан бўлгани, яъна ўша бозорчи аёлларни ишга солишгани тақдим этилган видео-фото материалларда кўриниб турибди.Маълумот учун, «Дарё» мухбири Азиз Абдувалиев блогер Дима Қаюм билан интервью уюштирди. Интервью яқин вақт ичида сайтга жойлаштирилади.Дима Қаюмга нисбатан тажовуз, таҳдидни, ‘самосуд’ ҳолатини ва унга тегишли телефон экранини синдириб ташланганини кескин қоралайман, тегишли вазирлик ва идоралардан бу ҳолатни зудлик билан ўрганиб чиқишларини ҳамда алоҳида назоратга олишларини сўрайман.
Бир гуруҳ шахслар томонидан ‘Бозор бузилганида айбдорсан’, ‘кутубхона қурмайсан’ деб айбланиб, ‘самосуд’ қилинган Дима Қаюм акс этган видеони кўриб, юртдошларимизнинг ҳуқуқий онги пастлигидан улар ўз хатти-ҳаракатлари билан инсон ҳақ-ҳуқуқларини паймол этиб, ўзбошимчалик қилиб, уларнинг ўзи жиноятга қўл ураётганини англаб етмагани кўриниб турибди.
Юртдошларимиз орасида босар-тусарини билмай қолган ‘самосуд’чилар, бизнинг жамиятда қонун устуворлигини унутиб, ҳуқуқ-тартибот хизматлари ва суднинг ваколатларини наҳот ўз зиммаларига олишга уринмоқдалар. Бу ачинарли ҳолат!
Шу ўринда ташвиш билан ёзиш мумкинки, охирги пайтлар ‘самосуд’ ҳолатлари кўпайиб бормоқда.
‘Самосуд’чиларга қўйиб берса, айбдорни ўша ерни ўзида сазойи қилиб юборишдан, дорга тортиб юборишдан ҳам тап тортишмайди.
Яна такрорлайман!
Ким бўлишидан қаъти назар ‘самосуд’ ҳолатига йўл қўйлиши мумкин эмас!
Жамият у қандай жамият бўлмасин, у албатта, қонун-қоида асосида, тартиб-интизом билан яшашни истайди, шундагина миллат, халқ бирлиги, тотувлигига эришилади.
Одил судловнинг фақат суд томонидан амалга оширилиши шарт.
‘Самосуд’чилар ўзларининг хатти-ҳаракатлари, ўзбошимчаликлари билан, ҳақиқий ёки фараз қилинган ҳуқуқларни ўзбошимчалик билан амалга ошириши фуқароларнинг ҳуқуқлари ёки қонун билан қўриқланадиган манфаатларига жиддий зиён етказилишига сабаб бўлаётганларини англаб етмасалар?
Уларнинг хатти-ҳаракатларига тегишли органлар ҳуқуқий баҳо бериши ва тегишли жазога тортиши керак.
Шу ўринда, суд ҳукми, жиноят содир этган ҳар бир шахсга адолатли жазо берилиши ёки бошқа таъсир чораси қўлланилиши ҳамда айби бўлмаган ҳеч бир шахс жавобгарликка тортилмаслиги ва ҳукм қилинмаслиги ҳақидаги жиноят суд иш юритувининг асосий вазифаларини ҳал этадиган, суд муҳокамасига якун ясайдиган Ўзбекистон Республикаси номидан чиқариладиган одил судловнинг муҳим ҳужжатидир.
Ўзбекистон Республикаси Конституциясининг 26-моддаси, Инсон ҳуқуқлари бўйича Умумжаҳон декларациясининг 11-моддаси, Фуқаролик ва сиёсий ҳуқуқлар бўйича халқаро пактнинг 14-моддаси ҳамда ЖПКнинг 23-моддасига мувофиқ жиноят содир этганликда айбланаётган ҳар бир шахснинг иши судда қонуний тартибда, ошкора кўриб чиқилиб, унинг айби аниқланмагунча у айбдор ҳисобланмайди.
Судда айбланаётган шахсга ўзини ҳимоя қилиш учун барча шароитлар таъминлаб берилади.
Фақат асосли ва одилона жазо тайинлаш орқалигина жамиятни жиноий хуружлардан самарали ҳимоя этиш, судланганларни тузатиш ва қайта тарбиялашга эришиш, судланганлар ҳамда бошқа шахслар томонидан янги жиноятлар содир этилишининг олдини олишни таъминлаш мумкин.
Нуриддин Зайнитдинов, Халқ депутатлари Учтепа туман Кенгаши депутати, ЎзЛиДеП депутатлик гуруҳи раҳбарининг ўринбосари.
Изоҳ (0)