10 октябрь куни Ўзбекистон Энергетика вазирлигида электр энергетикаси, нефть-газ ва ёқилғи-энергетика мажмуаси (ЁЭМ)нинг бошқа соҳалари бўйича Ўзбекистон—Ҳиндистон ҳамкорлигини ривожлантириш масалалари муҳокама этилди. Бу ҳақда вазирлик матбуот хизмати хабар берди.
Учрашувда Энергетика вазирининг биринчи ўринбосари Жўрабек Мирзамаҳмудов ва Ҳиндистоннинг Ўзбекистондаги элчиси Сантош Жа иштирок этди.
Мулоқот чоғида икки мамлакат ўртасида ЁЭМнинг турли йўналишларида ҳамкорлик истиқболлари ҳақида сўз юритилди. Хусусан, нефть-газ соҳасида ҳозирги вақтда Ҳиндистоннинг «ONGC Videsh Limited” компанияси Ўзбекистоннинг қатор инвестиция блокларида геология-қидирув ишларини олиб бориш имкониятини кўриб чиқаётгани маълум қилинди.
Учрашув давомида Ҳиндистон томони жорий йилнинг февраль ойида ташкил этилган Ўзбекистон Энергетика вазирлигининг олдига қўйилган мақсад ва вазифалар, шунингдек айни вақтда ЁЭМ соҳасида амалга оширилаётган ислоҳотлар билан таништирилди.
Таъкидландики, Энергетика вазирлиги электр ва иссиқлик энергияси, кўмир ишлаб чиқариш, етказиш ва тақсимлаш, шунингдек нефть, газни қазиб олиш, қайта ишлаш, уларни қайта ишлаш натижасида олинган маҳсулотларни етказиб бериш, тақсимлаш, сотиш ва фойдаланишда давлат мувофиқлаштириш жараёнини юритади.
Ҳиндистон томонига Ўзбекистонда электр энергияси истеъмолининг йиллик ўсиш прогнози 6—7 фоизни ташкил этиши ва 2030 йилга бориб 121 миллиард киловатт/соат электр энергиясининг кафолатли ишлаб чиқарилишини таъминлаш зарурлиги, мавжуд 31,8 ГВт ишлаб чиқариш қувватларини ҳисобга олган ҳолда, энергетика соҳасидаги инвестиция лойиҳаларида иштирок этиш имконияти тақдим этилди.
Аввалроқ, Ҳиндистон туркман газидан воз кечишни режалаштираётгани ҳақида хабар берилган эди.
Изоҳ (0)