Ангор тумани ХТБ тумандаги 19-мактабда дарслар 4 смена ўтилаётгани ҳақидаги хабарга раддия берди

Сурхондарё вилоятининг Ангор туманидаги 19-умумтаълим мактабида синф хоналари етишмаслиги сабабли дарслар 4-смена ўтилаётгани ҳақида «Дарё» мухбири Наргиза Раҳматуллаева томонидан хабар берилган эди.

Ангор тумани Халқ таълими бўлими мазкур хабарга ўз муносабатини билдирди.

Раддияда айтилишича, «Дарё» мухбири томонидан берилган хабар тафсилотлари мутахассислар томонидан ўрганиб чиқилган ва журналистнинг берган маълумоти ўз тасдиғини топмаган.

Мактаб ҳақиқатан ҳам 1994 йил қурилган. Бинонинг қуввати 320 ўринли бўлиб, ҳозирги кунда 28 та синфда 576 нафар ўқувчи таълим-тарбия олмоқда. Мактаб 2019 йилда маҳаллий бюджет ҳисобидан 859 миллион сўмга капитал таъмирланди, дейилади ХТБ раддиясида.

Туман ХТБ томонидан таъкидланишича, мактабнинг ўқув-тарбия ишлари бўйича директор ўринбосари Ғулом Хурсанов «Дарё» журналисти билан бўлган суҳбатда «Мактабимизда 4 сменада дарслар ўтилади», — деган маълумотни бермаганлиги маълум бўлган.

Мактабнинг қувватидан келиб чиқиб, агар зарурат туғилса, 640 нафар ўқувчини тўлиқ икки навбатда қабул қилиш имконияти мавжуд бўлган ҳолда журналист Наргиза Раҳматуллаева қандай манбага асосланиб, 4 сменада ўқитиляпти деган маълумот берганлиги ноаниқ бўлиб қолмоқда, дейилади раддияда.

Қайд этилишича, мактаб биносида жами 19 та хона мавжуд бўлиб, шулардан 13 таси синфхона ҳисобланади. Ўқув йили бошида битта синфга хона етишмовчилиги ҳамда жиҳозлар тўлиқ етиб келмаганлиги сабабли фақатгина иккита (4 «А» ва «Б») синф 3 сменада ўқитилган. Ҳозирги кунда мактабдаги ўқитувчилар учун ажратилган хона маънавий-маърифий ишлар бўйича директор ўринбосари хонасига кўчирилди ва синфлар тўлиқ 2 сменага жойлаштирилди. Ҳозир дарслар тўлиқ 2 сменада ўқитилмоқда.

ХТБ томонидан қайд этилишича, туман халқ таълими бўлими мудири Н.Мамадиёровнинг 19-сонли умумтаълим мактабининг ўқувчилари 4 навбатда ўқиётганлиги ҳақида мутлақо маълумот бермаганлиги аниқланган.

Бундан ташқари, журналист Наргиза Раҳматуллаеванинг маълумотига кўра, технология ва атрофимиздаги олам фанлари кабинетларда эмас, ташқарида ўтилмоқда дейилган. Бу маълумот ҳам ўз тасдиғини топмади. Мактаб технология фани ўқув жиҳозлари билан таъминланмаган. Аммо, технология ва атрофимиздаги олам дарсларини тақвимий-мавзуий режага кўра мактаб ҳовлисида, табиат билан боғлаб ўтиш ва атроф билан таништириш белгиланган, дейилади раддияда.Раддияда айтилишича, тумандаги 14 та мактабда спорт заллари мавжуд эмас. Ушбу мактабларга дастур асосида янгидан спорт заллари қуриб фойдаланишга топшириш режалаштирилган. 19-сонли умумтаълим мактабида спорт зали қурилиши 2021 йилга мўлжалланган.

Мақолада «Бир вақтнинг ўзида жисмоний тарбия дарси битта ўқитувчи томонидан иккита синфга ўтилаётган экан» деган жумла келтирилган. Жисмоний тарбия ўқитувчиси Холмамат Тўхтаев «Шароит йўқлигидан бир вақтнинг ўзида 2 «Д» ва 2 «В» синфларида жисмоний тарбия дарсини ўтаяпман» деган изоҳни берган. Ушбу синфларга дарслар икки сменада ўтилган. Дарс жадвалининг йўриқнома асосида тузилишига кўра, жисмоний тарбия дарси охирги соатларга қўйилган. Синфхоналарни  учинчи сменада ўқиётган 3-синфга бўшатиб бериш лозим бўлган. Ҳозирги вақтда дарс жадвали бўйича параллель дарслар мавжуд эмас. Ўқитувчиларнинг дарс беришлари учун шароитлар яратилган, дейилади раддияда.