Ўзбекистонда умумий овқатланиш ва кўнгилочар муассасаларнинг узлуксиз фаолият кўрсатиш тартибини белгиловчи Вазирлар Маҳкамасининг қарори жорий йилнинг 15 октябридан бошлаб кучга кирди. Белгиланган шароитлар ва қоидаларга амал қилинса, тадбиркорлар ҳеч қандай хавотирсиз тунда ўз фаолиятини олиб бориши мумкин, деб ёзмоқда Spot.
Қўйилган талаблар қаторидан видеокузатув тизимининг мавжудлиги, шовқин меъёрлари талабларига амал қилиш, туташ ҳудуднинг ёритилиши ва бошқалар ўрин олган. Кафе, ресторан ёки тунги клуб раҳбари ҳудудий ички ишлар органларига мазкур талабларнинг бажарилгани ҳақида маълумот бериши керак.
Ўзбекистонда умумий овқатланиш муассасаларининг узлуксиз ёки тунда ишлашини чекловчи ҳужжат мавжуд эмас. Бироқ бу маҳаллий ҳокимият органларига тунги рейдларни амалга оширишга ва оғзаки топшириқ асосида тадбиркорларни соат 23:00 дан кейин муассасани ёпишга мажбур қилишига халақит бермади, деб ёзмоқда нашр.
Бундай рейдлар натижасида барча ютқазди — сайёҳлар норози бўлди, бизнес йўқотишларга учради.
Туризмни ривожлантириш давлат қўмитаси томонидан маълум қилинишича, сайёҳлар айнан тунги пайтда кўпроқ пул сарфлайди. Шунга мувофиқ равишда, узлуксиз ишлайдиган муассасалар кўпайса, бюджетга тушумлар ортади.
Бундан буён тунда ишлайдиган муассаса барча талабларни бажарса, ҳуқуқни муҳофаза қилувчи органлар унинг ишига аралашиш ҳуқуқига эга эмас.
Агар қоидаларга амал қилинмаса, тунги фаолият тақиқланади, бундан ташқари бу ҳолат белгиланган тартибда жавобгарликка сабаб бўлади.
Бундан ташқари, тунда фаолият юритиш ҳуқуқи муассаса томонидан қарорда белгиланган талаблар бузилганда ёки жамоатчилик томонидан унинг устидан доимий шикоятлар келиб тушса, тегишли ҳокимиятлар томонидан бекор қилиниши мумкин.
Эслатиб ўтамиз, 2018 йил августида Юнусободда жойлашган Аурум 898 тунги клубида рўй берган пичоқбозлик оқибатида эркин курашчи, халқаро тоифадаги спорт устаси Жамшид Кенжаев вафот этганди.
Изоҳ (0)