UzAuto Motors компаниясининг ИИВга йўллаган мурожаати юзасидан Тергов департаменти томонидан «Авто олтмиш ой» масъулияти чекланган жамиятининг мансабдор шахслари ва бошқаларга нисбатан жиноят иши қўзғатилди.
Вазирлик матбуот хизматининг хабарига кўра, жамият мансабдорларига нисбатан Жиноят кодексининг 188-1-моддаси (пул маблағларини ва бошқа мол-мулкни жалб этишга доир ноқонуний фаолият) 1-қисми билан жиноий иш очилган.
Олиб борилаётган дастлабки тергов ҳаракатлари давомида фуқароларнинг мол-мулкини жиноий тажовуздан ҳимоялаш ва «Авто олтмиш ой» масъулияти чекланган жамиятининг фаолияти шаффофлигини ўрганиш мақсадида, молия-хўжалик фаолияти ҳужжатли тафтишни ўтказиш йўли билан текширилади.
Айни вақтда «Авто олтмиш ой» масъулияти чекланган жамиятининг бош офиси ва вилоятлардаги филиалларида мавжуд бухгалтерия ҳужжатларини аниқлаб олиш мақсадида, тергов гуруҳлари томонидан тинтув тергов ҳаракатлари ўтказилмоқда.
Шунингдек, тадбиркорлик субъектининг назорат кирим-чиқим операциялари назоратга олинади, лекин фаолияти тўхтатиб қўйилмаслиги таъкидланган.
Тафтиш якунига кўра мазкур жамият мансабдор шахслари ва бошқаларнинг ҳаракатларига ҳуқуқий баҳо берилиб, жиноят иши бўйича якуний қарор қабул қилинади.
Изоҳ (0)